Offrynnow an Hembrenkysi

1Y'n jydh may hworfennsa Moyses settya an tabernakel, ha'y untya ha'y sakra gans oll y dhaffar, hag untya ha sakra an alter gans oll y dhaffar, 2hembrenkysi Ysrael, pennow chiow aga thasow, hembrenkysi an loethow, esa a-ugh an re a veu niverys, 3a dhros aga offrynnow a-rag an Arloedh, hwegh kert kudhys ha dewdhek ojyon, kert rag pub dew a'n hembrenkysi, ha rag pub huni unn ojyon; i a's offrynnas a-rag an tabernakel. 4Ena an Arloedh a leveris dhe Moyses, 5Degemmer an re ma a-dhiworta, may fons devnydhys ow kul servis tylda an kuntelles, ha'ga ri dhe'n Levysi, dhe bub gour herwydh y servis. 6Ytho Moyses a gemmeras an kertys ha'n oghen ha'ga ri dhe'n Levysi. 7Dew gert ha peswar ojyon ev a ros dhe vebyon Gershon, herwydh aga servis; 8ha peswar kert hag eth ojyon ev a ros dhe vebyon Merari, herwydh aga servis, yn-dann gevarwoedhyans Ithamar mab Aron an oferyas. 9Mes dhe vebyon Kohath ny ros travyth, drefenn aga bos charjys gans gwith an taklow sans hag a dela bos degys war an skoedh. 10Ha'n hembrenkysi a offrynnas offrynnow rag sakrans an alter y'n jydh may feu untys; ha'n hembrenkysi a offrynnas aga offrynn a-rag an alter. 11Ha'n Arloedh a leveris dhe Moyses: I a wra offrynna aga offrynnow, unn hembrenkyas pub dydh, rag sakrans an alter.

12Ev neb a offrynnas y offrynn an kynsa dydh o Nahshon mab Amminadab, a loeth Yuda; 13ha'y offrynn o unn plat a arghans ha dhodho poes a gans shekel ha deg warn ugens, unn bolla a arghans a dheg shekel ha tri-ugens, war-lergh shekel an sentri, ha'n dhew anedha leun a vleus fin kemmyskys gans oyl rag offrynn greun; 14unn skudell a owr a dheg shekel, leun a ynkys; 15unn tarow yowynk, unn hordh, unn oen gorow a unn bloedh, rag offrynn leskys; 16unn bogh rag offrynn pegh; 17ha rag an sakrifis a offrynnow kres, dew ojyon, pymp hordh, pymp bogh, ha pymp oen unn bloedh. Hemm o offrynn Nahshon mab Amminadab.

18Y'n nessa dydh Nethanel mab Suar, hembrenkyas Yssakar, a wrug offrynn; 19ev a offrynnas rag y offrynn unn plat a arghans ha dhodho poes a gans shekel ha deg warn ugens, unn bolla a arghans a dheg shekel ha tri-ugens, war-lergh shekel an sentri, ha'n dhew leun a vleus fin kemmyskys gans oyl rag offrynn greun; 20unn skudell a owr a dheg shekel, leun a ynkys; 21unn tarow yowynk, unn hordh, unn oen gorow a unn bloedh, rag offrynn leskys; 22unn bogh rag offrynn pegh; 23ha rag an sakrifis a offrynnow kres, dew ojyon, pymp hordh, pymp bogh, ha pymp oen gorow a unn bloedh. Hemm o offrynn Nethanel mab Suar.

24Y'n tressa dydh Eliab mab Helon, hembrenkyas mebyon Zebulun: 25y offrynn o unn plat a arghans ha dhodho poes a gans shekel ha deg warn ugens, unn bolla a arghans a dheg shekel ha tri-ugens, war-lergh shekel an sentri, ha'n dhew anedha leun a vleus fin kemmyskys gans oyl rag offrynn greun; 26unn skudell a owr a dheg shekel, leun a ynkys; 27unn tarow yowynk, unn hordh, unn oen gorow a unn bloedh, rag offrynn leskys; 28unn bogh rag offrynn pegh; 29ha rag an sakrifis a offrynnow kres, dew ojyon, pymp hordh, pymp bogh, ha pymp oen unn bloedh. Hemm o offrynn Eliab mab Helon.

30Y'n peswora dydh Elisur mab Shedeur, hembrenkyas mebyon Rewben: 31y offrynn o unn plat a arghans ha dhodho poes a gans shekel ha deg warn ugens, unn bolla a arghans a dheg shekel ha tri-ugens, war-lergh shekel an sentri, ha'n dhew anedha leun a vleus fin kemmyskys gans oyl rag offrynn greun; 32unn skudell a owr a dheg shekel, leun a ynkys; 33unn tarow yowynk, unn hordh, unn oen gorow a unn bloedh, rag offrynn leskys; 34unn bogh rag offrynn pegh; 35ha rag an sakrifis a offrynnow kres, dew ojyon, pymp hordh, pymp bogh, ha pymp oen unn bloedh. Hemm o offrynn Elisur mab Shedeur.

36Y'n pympes dydh Shelumiel mab Surishadday, hembrenkyas mebyon Simeon: 37y offrynn o unn plat a arghans ha dhodho poes a gans shekel ha deg warn ugens, unn bolla a arghans a dheg shekel ha tri-ugens, war-lergh shekel an sentri, ha'n dhew anedha leun a vleus fin kemmyskys gans oyl rag offrynn greun; 38unn skudell a owr a dheg shekel, leun a ynkys; 39unn tarow yowynk, unn hordh, unn oen gorow a unn bloedh, rag offrynn leskys; 40unn bogh rag offrynn pegh; 41ha rag an sakrifis a offrynnow kres, dew ojyon, pymp hordh, pymp bogh, ha pymp oen unn bloedh. Hemm o offrynn Shelumiel mab Surishadday.

42Y'n hweghves dydh Eliasaf mab Deuel, hembrenkyas mebyon Gad: 43y offrynn o unn plat a arghans ha dhodho poes a gans shekel ha deg warn ugens, unn bolla a arghans a dheg shekel ha tri-ugens, war-lergh shekel an sentri, ha'n dhew leun a vleus fin kemmyskys gans oyl rag offrynn greun; 44unn skudell a owr a dheg shekel, leun a ynkys; 45unn tarow yowynk, unn hordh, unn oen gorow a unn bloedh, rag offrynn leskys; 46unn bogh rag offrynn pegh; 47ha rag an sakrifis a offrynnow kres, dew ojyon, pymp hordh, pymp bogh, ha pymp oen unn bloedh. Hemm o offrynn Eliasaf mab Deuel.

48Y'n seythves dydh Elishama mab Ammihud, hembrenkyas mebyon Efraym: 49y offrynn o unn plat a arghans ha dhodho poes a gans shekel ha deg warn ugens shekel, unn bolla a arghans a dheg shekel ha tri-ugens, war-lergh shekel an sentri, ha'n dhew anedha leun a vleus fin kemmyskys gans oyl rag offrynn greun; 50unn skudell a owr a dheg shekel, leun a ynkys; 51unn tarow yowynk, unn hordh, unn oen gorow a unn bloedh, rag offrynn leskys; 52unn bogh rag offrynn pegh; 53ha rag an sakrifis a offrynnow kres, dew ojyon, pymp hordh, pymp bogh, ha pymp oen unn bloedh. Hemm o offrynn Elishama mab Ammihud.

54Y'n ethves dydh Gamaliel mab Pedasur, hembrenkyas mebyon Manasse: 55y offrynn o unn plat a arghans ha dhodho poes a gans shekel ha deg warn ugens, unn bolla a arghans a dheg shekel ha tri-ugens, war-lergh shekel an sentri, ha'n dhew anedha leun a vleus fin kemmyskys gans oyl rag offrynn greun, 56unn skudell a owr a dheg shekel, leun a ynkys; 57unn tarow yowynk, unn hordh, unn oen gorow a unn bloedh, rag offrynn leskys; 58unn bogh rag offrynn pegh; 59ha rag an sakrifis a offrynnow kres, dew ojyon, pymp hordh, pymp bogh, ha pymp oen unn bloedh. Hemm o offrynn Gamaliel mab Pedasur.

60Y'n nawves dydh Abidan mab Gideoni, hembrenkyas mebyon Benyamin: 61y offrynn o unn plat a arghans ha dhodho poes a gans shekel ha deg warn ugens, unn bolla a arghans a dheg shekel ha tri-ugens, war-lergh shekel an sentri, ha'n dhew leun a vleus fin kemmyskys gans oyl rag offrynn greun; 62unn skudell a owr a dheg shekel, leun a ynkys; 63unn tarow yowynk, unn hordh, unn oen gorow a unn bloedh, rag offrynn leskys; 64unn bogh rag offrynn pegh; 65ha rag an sakrifis a offrynnow kres, dew ojyon, pymp hordh, pymp bogh, ha pymp oen unn bloedh. Hemm o offrynn Abidan mab Gideoni.

66Y'n degves dydh Ahiezer mab Ammishadday, hembrenkyas mebyon Dan: 67y offrynn o unn plat a arghans ha dhodho poes a gans shekel ha deg warn ugens, unn bolla a arghans a dheg shekel ha tri-ugens, war-lergh shekel an sentri, ha'n dhew leun a vleus fin kemmyskys gans oyl rag offrynn greun; 68unn skudell a owr a dheg shekel, leun a ynkys; 69unn tarow yowynk, unn hordh, unn oen gorow a unn bloedh, rag offrynn leskys; 70unn bogh rag offrynn pegh; 71ha rag an sakrifis a offrynnow kres, dew ojyon, pymp hordh, pymp bogh, ha pymp oen unn bloedh. Hemm o offrynn Ahiezer mab Ammishadday.

72Y'n unnegves dydh Pagiel mab Okran, hembrenkyas gwer Asher: 73y offrynn o unn plat a arghans ha dhodho poes a gans shekel ha deg warn ugens, unn bolla a arghans a dheg shekel ha tri-ugens, war-lergh shekel an sentri, ha'n dhew leun a vleus fin kemmyskys gans oyl rag offrynn greun; 74unn skudell a owr a dheg shekel, leun a ynkys; 75unn tarow yowynk, unn hordh, unn oen gorow a unn bloedh, rag offrynn leskys; 76unn bogh rag offrynn pegh; 77ha rag an sakrifis a offrynnow kres, dew ojyon, pymp hordh, pymp bogh, ha pymp oen unn bloedh. Hemm o offrynn Pagiel mab Okran.

78Y'n dewdhegves dydh Ahira mab Enan, hembrenkyas mebyon Naftali: 79y offrynn o unn plat a arghans ha dhodho poes a gans shekel ha deg warn ugens, unn bolla a arghans a dheg shekel ha tri-ugens, war-lergh shekel an sentri, ha'n dhew leun a vleus fin kemmyskys gans oyl rag offrynn greun; 80unn skudell a owr a dheg shekel, leun a ynkys; 81unn tarow yowynk, unn hordh, unn oen gorow a unn bloedh, rag offrynn leskys; 82unn bogh rag offrynn pegh; 83ha rag an sakrifis a offrynnow kres, dew ojyon, pymp hordh, pymp bogh, ha pymp oen unn bloedh. Hemm o offrynn Ahira mab Enan.

84Hemm o rag sakrans an alter, y'n jydh may feu untys, a-dhiworth hembrenkysi Ysrael: dewdhek plat a arghans, dewdhek bolla a arghans, dewdhek skudell a owr, 85pub plat a arghans gans poes a gans shekel ha deg warn ugens, ha pub bolla deg ha tri-ugens, oll an arghans a'n lestri dew vil ha peswar kans shekel war-lergh shekel an sentri, 86dewdhek skudell a owr, leun a ynkys, ow poesa deg shekel pub huni war-lergh shekel an sentri, oll an owr a'n skudellow ow pos kans hag ugens shekel; 87oll an gwarthek rag an offrynn leskys dewdhek tarow, dewdhek hordh, dewdhek oen unn bloedh, gans aga offrynn greun; ha dewdhek bogh rag offrynn pegh, 88hag oll an gwarthek rag an sakrifis a offrynnow kres peswar tarow warn ugens, an hordhes tri-ugens, an boghes tri-ugens, an eyn unn bloedh tri-ugens. Hemm o offrynn an sakrans rag an alter pan veu untys.

89Ha pan eth Moyses dhe dylda an kuntelles dhe gewsel gans an Arloedh, ev a glewas lev ow kewsel orto a-ugh an dregeredhva hag esa war argh an dustuni, yntra dew gerub; hag ev a gewsis orto.