An Seyth Lugarn

1Lemmyn an Arloedh a leveris dhe Moyses, 2Lavar dhe Aron, Pan settydh an lugern, an seyth lugarn a re golow a-rag an kantoler. 3Hag Aron a wrug yndella; ev a settyas y lugern dhe ri golow a-rag an kantoler, dell worhemmynnis an Arloedh dhe Moyses. 4Ha hemm o kreft an kantoler, ober mortholys yn owr; a'y droes dh'y vleujennow, yth o ober mortholys; war-lergh an patron a dhiskwedhas an Arloedh dhe Moyses, yndellma ev a wrug an kantoler.

Glanheans an Levysi

5Ha'n Arloedh a leveris dhe Moyses, 6Kemmer an Levysi a-dhiworth mebyon Ysrael, ha'ga glanhe. 7Hag yndellma ty a wra dhedha, dh'aga glanhe: gwra skoellya dowr an glanheans warnedha, ha gas i dhe vos gans altenn war oll aga horf, ha golghi aga dillas hag omlanhe. 8Ena gas i dhe gemmeres tarow yowynk ha'y offrynn greun a vleus fin kemmyskys gans oyl, ha ty a gemmer tarow yowynk arall rag offrynn pegh. 9Ha ty a dhre an Levysi a-rag tylda an kuntelles, ha gelwel an gemmynieth oll a vebyon Ysrael. 10Pan dhredh an Levysi a-rag an Arloedh, mebyon Ysrael a worr aga diwleuv war an Levysi. 11Hag Aron a wra profya an Levysi a-rag an Arloedh, offrynn gwevys a-dhiworth mebyon Ysrael, may fons sakrys dhe wul servis an Arloedh. 12Ena an Levysi a worr aga diwleuv war benn an terewi; ha ty a wra profya an eyl rag offrynn pegh ha'y gila rag offrynn dre dan dhe'n Arloedh, rag gul prenedh a-barth an Levysi. 13Ha ty a wra dhe'n Levysi sevel a-rag Aron ha'y vebyon, ha'ga offrynna avel offrynn gwevys dhe'n Arloedh.

14Yndellma ty a dhiberth an Levysi a-dhiworth mebyon Ysrael, ha'n Levysi a vydh dhymm. 15Ha wosa henna an Levysi a wra entra dhe servya tylda an kuntelles, wosa ty dh'aga glanhe ha'ga offrynna avel offrynn gwevys. 16Rag res dhymm yn tien yth yns i a-dhiworth mebyon Ysrael; yn le seul a iger pub torr, pub kynsa-genys a vebyon Ysrael, my re's kemmeras ragov ow honan. 17Rag pub kynsa-genys yn mysk mebyon Ysrael yw dhymm, ha den ha best; y'n jydh may ledhis pub kynsa-genys yn pow Ejyp my a's sakras dhymm ow honan, 18ha my re gemmeras an Levysi yn le pub kynsa-genys yn mysk mebyon Ysrael. 19Ha my re ros an Levysi yn ro dhe Aron ha'y vebyon yn mysk mebyon Ysrael, dhe wul servis rag mebyon Ysrael yn tylda an kuntelles, ha dhe wul prenedh rag mebyon Ysrael, ma na vo pla yn mysk mebyon Ysrael mar teffons nes dhe'n sentri.

20Yndellma y hwrug Moyses hag Aron ha'n kuntelles oll a vebyon Ysrael dhe'n Levysi; war-lergh pup-tra a worhemmynnis an Arloedh dhe Moyses a-dro dhe'n Levysi, mebyon Ysrael a wrug dhedha. 21Ha'n Levysi a omlanhas a begh, ha golghi aga dillas; hag Aron a's offrynnas avel offrynn gwevys a-rag an Arloedh, hag Aron a wrug prenedh ragdha dh'aga glanhe. 22Ha wosa henna an Levysi a entras dhe wul aga servis yn tylda an kuntelles a-rag Aron ha'y vebyon; dell worhemmynnsa an Arloedh dhe Moyses a-dro dhe'n Levysi, yndellma i a wrug dhedha.

23Ha'n Arloedh a leveris dhe Moyses, 24Hemm yw an pyth a dhegoedh dhe'n Levysi: a bymp bloedh warn ugens ha moy i a wra mos dhe wul ober an servis yn tylda an kuntelles; 25hag a'n oes a dheg blydhen ha dew-ugens i a wra omdenna a ober an servis ha ny servyons namoy, 26mes menystra dh'aga breder yn tylda an kuntelles, dhe witha an charj, ha ny wrons servis. Yndellma ty a wra dhe'n Levysi a-dro dh'aga deverow.