Breus Duw erbynn Edom

1Gwelesigeth Obadia.

Yndellma y lever an Arloedh Duw a-dro dhe Edom:

Ni re glewas nowodhow dhiworth an Arloedh,

ha kannas re beu dannvenys yn mysk an kenedhlow: ‘Sevewgh hwi, ha sevyn ni er hy fynn rag an gas.’

2Otta, my a'th wrug byghan yn mysk an kenedhlow;

dispresys yn feur osta.

3Goeth dha golonn re'th toellas,

ty neb eus trigys ughel yn savnow an garrek,

y drigva y'n ughelder,

ow leverel y'th kolonn,

‘Piw a'm dre yn-nans dhe'n dor?’

4Kyn nijydh ughel kepar ha'n er,

ha kyn settydh dha neyth yn mysk an ster,

my a'th tre yn-nans alena,

yn-medh an Arloedh.

5Mar teffa robbyoryon dhis,

po ladron yn nos,

fatell allses bos distruys?

A ny wrussens ladra unnweyth an pyth a ve lowr ragdha i aga honan?

Mar teffa kuntelloryon grappys dhis,

a ny wrussens gasa rann a'n grappys?

6Mes assa vydh Esaw leun hwithrys,

pyllys y dresoryow kudh!

7Oll dha geffrysysi a'th chasyas dhe'n oryon;

an re yn kres genes re'th toellas,

i re brevaylyas warnas;

an re a dheber bara genes a sett maglenn yn-dannos,

heb ty dh'y gonvedhes.

8Y'n jydh na, yn-medh an Arloedh,

a ny wrav vy distrui tus fur yn-mes a Edom,

ha konvedhes yn-mes a venydh Esaw?

9Dha gasoryon a berth own, Teman,

rag bos pub den oll a venydh Esaw treghys dhe-ves.

10Drefenn an ladhva ha'n garowder gwrys erbynn dha vroder Yakob,

meth a wra dha gudha,

ha ty a vydh treghys dhe-ves bynitha.

11Y'n jydh may sevsys a-denewen,

y'n jydh may hwrug alyons kemmeres y lu yn keth,

hag estrenyon a dheuth bys dh'y yetys,

ha tewlel prenn war Yerusalem,

ty ynwedh o kepar hag onan anedha.

12Mes ny dalvia, ty dhe vires yn heudh war dhydh dha vroder

yn dydh y anfeusi,

na lowenhe war vebyon Yuda

yn dydh aga diswrians;

na kewsel yn howtyn

yn dydh aga diswrians.

13Ny dalvia, ty dhe dhos a-ji dhe yet ow fobel

yn dydh aga therroes,

na mires, ty ynwedh, yn heudh war y anken

yn dydh y derroes,

na settya dalghenn yn y bythow

yn dydh y derroes.

14Ny dalvia, ty dhe sevel orth an growsfordh

may hylli treghi yn-nans y fowesigyon,

na dhaskorr an re a fi alena

yn dydh anken.

15Rag ogas yw dydh an Arloedh

rag oll an kenedhlow.

Kepar dell wrussys, yndellma y fydh gwrys dhiso jy;

dha attal a dheu war dha benn dha honan.

16Rag kepar dell wrussowgh eva war ow menydh sans,

yn kettella y hwra an kenedhlow oll eva heb hedhi.

Eva a wrons, ha lenki,

hag y fydhons kepar ha pan nag esens bythkweth yn few.

17Mes war venydh Sion y fydh remenant a'n re a dhienk,

hag y fydh tyller sans.

Ha chi Yakob a dhaskemmer eretons an dus a gemmersa aga eretons i.

18Chi Yakob a vydh tan,

ha chi Yosep a vydh flamm;

chi Esaw a vydh sowl,

hag i a worr tan ynna ha'ga devorya.

Ny vydh denvyth gesys a ji Esaw,

rag an Arloedh re gewsis.

19Tus an Negeb a gemmer menydh Esaw yn perghennogeth,

ha tus an Shefela a gemmer pow an Filistysi.

I a gemmer tiredh Efraym ha tiredh Samaria,

ha Benyamin a gemmer Gilead yn perghennogeth.

20Divresow an lu ma a vebyon Ysrael

a gemmer tiredh an Kananysi bys yn Sarefath,

ha divresow Yerusalem usi yn Sefarad

a gemmer sitys an dhyghowbarth.

21Ha tus delivrys a yn-bann dhe venydh Sion

dhe rewlya menydh Esaw;

ha'n myghternsys a vydh dhe'n Arloedh.