Salusyans

11 Powl ha Timothi, gwesyon Krist Yesu,

Dhe oll an syns yn Krist Yesu usi yn Filippi gans an epskobow ha'n dhyagonyon:

2Gras dhywgh hwi ha kres dhiworth Duw agan Tas ha'n Arloedh Yesu Krist.

Gras ha Pysadow

3Grassav dhe'm Duw yn pub kov ahanowgh 4prest ow pysi ragowgh hwi oll gans lowena yn oll ow fysadow, 5yn agas kowethyans y'n aweyl dhiworth an kynsa dydh bys y'n eur ma, 6ow trestya dhe'n keth tra ma: neb re dhallathas gwrians da ynnowgh dh'y gowlwul bys yn dydh Yesu Krist; 7dell yw gwiw ragov dhe brederi ahanowgh hwi oll, rag ottahwi genev y'n golonn; rag hwi oll yw kevrennoryon genev a ras, hag y'm kolmow hag yn mentons ha kompoesans a'n aweyl. 8Rag Duw yw ow thest fatell yeunav ragowgh hwi oll yn kolodhyon Krist Yesu. 9Ha hemma my a bys, may hwrello agas kerensa palshe moy ha moy yn godhvos ha pub konvedhes, 10rag dissernya an taklow yw an gwella, may fewgh lel ha divlam bys yn dydh Krist, 11lenwys a frut ewnder dre Yesu Krist dhe wordhyans ha gormola Duw.

Dhymmo vy, Bewa yw Krist

12A vreder, my a vynn hwi dhe wodhvos, an taklow re hwarva dhymm dhe dreylya yn hwir dhe avonsyans an aweyl, 13may teuth ha bos apert yn oll an pretorium ha dhe bub den arall, ow holmow dhe vos yn Krist, 14ha'n brassa rann a'n vreder, kolonnekhes y'n Arloedh der ow holmow, yw moy hardh dhe gewsel an ger1:14 an ger: War-lergh re a'n dornskrifow ger Duw. heb own.

15Dhe wir, re a bregoth Krist der envi ha strif, mes re ynwedh dre volonjedh da; 16an re ma dre gerensa, ow kodhvos my dhe vos gorrys omma rag mentons an aweyl, 17an re na bregoth Krist dre gesstrif, heb lelder, mes hwansek dhe ynkressya ow godhevyans y'm kolmow. 18Pandra, ytho? Yn despit dhe henna, Krist yw pregewthys yn pub fordh, po yn falsuri po yn gwir, hag yn henna y lowenhav. Mes my a vynn lowenhe ynwedh, 19rag my a woer siwyans hemma dhe vos ow selwyans der agas pysadow, ha gweres res gans Spyrys Yesu Krist, 20war-lergh ow gwaytyans ha'm govenek na vydhav shamys yn travyth, mes y fydh Krist meurhes gans bolder leun avel pup-prys, hag y'n eur ma ynwedh y'm korf, po dre vewnans po dre vernans. 21Rag dhymmo vy bewa yw Krist ha merwel yw gwayn. 22Mes bewa y'n kig, hemm yw frut ow ober, ha ny wonn pandr'a vynnav dewis. 23Yth esov vy yn kaletter ynter an dhew, ow pos hwansek dhe vos dhe-ves ha bos gans Krist, rag henn yw meur gwell; 24mes moy res yw ragowgh hwi my dhe wortos y'n kig. 25Sur ov vy a-dro dhe hemma, ha my a woer my dhe wortos ha pesya genowgh rag agas avonsyans ha lowena y'n fydh, 26rag may palshaho agas bostyans yn Krist Yesu ynnov, rag my dhe dhos dhywgh arta.

27Saw bedhes agas bewedh gwiw dhe'n aweyl a Grist, mar tov dh'agas gweles po gortos a-ves, may klewviv ahanowgh, hwi dhe sevel yn unn spyrys gans unn enev, ow strivya war-barth rag fydh an aweyl, 28heb bos ownekhes yn travyth gans agas eskerens. Hemm yw prov a dhiswrians dhedha i, mes a'gas selwyans hwi, ha hemma dhiworth Duw. 29Rag y feu res dhywgh a-barth Krist, ha krysi dhodho hag ynwedh godhevel ragdho, 30hag yma genowgh an keth strif a welsowgh ynnov, ha lemmyn a glewowgh bos ynnov.