Uvelder Krist

1Ytho, mars eus konfort yn Krist, mars eus solas kerensa, mars eus kowethyans a'n Spyrys, mars eus pitedh ha truedh, 2gwrewgh lenwel ow lowena, ow prederi an keth tra gans an keth kerensa yn unn spyrys, unn tybyans, 3heb gul travyth dre gesstrif na dre woeth, mes yn uvelder, ow synsi pub den arall dhe vos gwell agesowgh agas honan, 4heb mires orth agas les agas honan mes orth les tus erell kekeffrys. 5Kemmerewgh yn agas mysk an tybyans ma esa ynwedh yn Krist Yesu;

6kyn feu yn furv Duw,

ny dybis bos par dhe Dhuw avel neppyth dhe sesya,

7mes yth omwakhas y honan,

ha kemmeres furv gwas,

devedhys yn hevelep tus;

ha kevys yn furv den

8ev a omuvelhas

ha dos ha bos gostydh bys yn ankow,

mernans yn krows.

9Rag hemma, Duw a'n ughelhas yn feur

ha ri dhodho an hanow2:9 an hanow: War-lergh re a'n dornskrifow hanow.

yw dres pub hanow,

10yn hanow Yesu

may plekkya pub glin, an re yn nev, an re war an nor, ha'n re yn-dann an nor,

11ha mayth avowa pub taves

bos Yesu Krist Arloedh,

dhe wordhyans Duw an Tas.

Oberi rag Selwyans

12Ytho, ow howetha garadow, kepar dell vewgh pup-prys gostydh pan esen genowgh hwi, oberewgh agas selwyans agas honan gans own ha kren hwath moy lemmyn pan esov dhe-ves. 13Rag Duw yw neb a ober ynnowgh, ha dhe vynnes ha dhe oberi orth bodh y vrys.

14Gwrewgh pup-tra heb krodhvolas na disputya, 15may fewgh divlam ha heb drog, fleghes heb namm a Dhuw, yn mysk kenedhel gamm ha treus, ha hwi a splann yn aga mysk kepar ha golowys y'n bys, 16ow synsi fast an ger a vewnans, may hylliv bostya yn dydh Krist na wrug vy poenya yn euver na lavurya yn euver. 17Mes dhe wir, mars ov skoellys avel offrynn diwes war agas sakrifis ha'n gonis a'gas fydh, my a lowenha ha keslowenhe genowgh hwi oll; 18hag y'n keth vaner, hwi ynwedh a lowenha ha keslowenhe genev.

Timothi hag Epafroditus

19Mes my a wayt y'n Arloedh Yesu dannvon Timothi dhywgh hwi kyns nep-pell, may fiv vy konfortys, my ynwedh, ow kodhvos nowodhow ahanowgh. 20Rag nyns eus genev denvyth a'n keth brys, a vydh prederus yn hwir yn agas kever. 21Rag pubonan anedha a hwila aga les aga honan; ny hwilons i les Krist Yesu. 22Mes y gnas ev hwi a's aswonn; ev dhe wonis genev y'n aweyl kepar ha mab gans tas. 23An keth hemma, ytho, my a wayt y dhannvon dhywgh kettell welliv fatell vydh taklow genev, 24mes my a drest y'n Arloedh my dhe dhos ow honan kyns nep-pell.

25Mes my a dybis bos res dannvon dhywgh Epafroditus, ow broder, kesoberer ha kessouder ha'gas kannas, ha menyster a'm edhomm, 26a-ban yeuni ev war agas lergh pubonan, ha troblys veu rag hwi dhe glewes y vos klav. 27Dhe wir, klav ova bys yn ankow. Mes Duw a dhiskwedhas tregeredh dhodho, ha nyns esa dhodho ev yn unnsel mes dhymmo vy ynwedh, na gaffen keudh war geudh. 28Ytho, dhe frettha my re'n dannvonas, may lowenhahowgh orth y weles arta, ha may fiv vy dhe le troblys. 29Rakhenna degemmerewgh ev y'n Arloedh gans lowena oll, ha gwrewgh enora tus a'n par na, 30rag der ober Krist, ev a dheuth bys yn ankow, ow peryllya y vewnans dhe gollenwel an gweres na yllewgh ri dhymm.