Na Drestyewgh y'n Kig

1Wor'tiwedh, ow breder, gwrewgh lowenhe y'n Arloedh. Dhymmo vy nyns yw dihedh skrifa an keth taklow dhywgh, mes dhywgh hwi sawder yw.

2Bedhewgh war a'n keun, bedhewgh war a'n dhrogoberoryon, bedhewgh war a'n fals tregh, 3Rag yth on ni an gwir drodreghyans,3:3 gwir: Nyns usi y'n Greka an ger ma. neb a wra gordhya dre Spyrys Duw ha bostya yn Krist Yesu, heb trestya y'n kig – 4kyn fo dhymmo vy ow honan ynwedh reson dhe drestya y'n kig. Mars eus den arall a drest y'n kig, my a drest dhe voy: 5trodreghys an ethves dydh, a'n genedhel a Ysrael, a loeth Benyamin, Ebrow a Ebrowyon, Farise war-lergh an lagha, 6a-dro dhe dhiwysykter, ow persekutya an eglos; a-dro dhe ewnder y'n lagha, divlam.

7Mes an taklow ma hag o gwayn dhymm, an re ma my re's synsis koll rag Krist. 8Moy es henna, my a syns bos pup-tra koll rag an pris dres eghenn a aswonnvos Krist Yesu ow Arloedh, rag neb my a gollas pup-tra, ha my a syns y vos skoellyon may kyffiv Krist, 9ha may fiv kevys ynno, heb kavoes ow ewnder vy a dheu a'n lagha mes an ewnder a dheu dre fydh yn Krist, an ewnder a dheu a Dhuw, selys war fydh; 10rag y aswonnvos ev ha galloes y dhasserghyans, ha kevrenn yn y alarow, kesformys yn y vernans, 11war neb kor may hylliv attaynya dasserghyans dhiworth an re varow3:11 dasserghyans dhiworth an re varow: War-lergh re a'n dornskrifow an dasserghyans usi dhiworth an re varow..

Strivya troha'n Peul-diwedh

12Nyns yw my dhe waynya seulabrys, po my dhe vos gwrys perfydh, mes my a striv, mar kallav synsi kepar dell veuv synsys ynwedh gans Krist Yesu. 13A vreder, ny amontyav my dhe synsi an gober ow honan. Mes unn dra a wrav: yth ankovav an taklow usi war ow lergh, hag yth ystynnav troha'n taklow usi a-dheragov, 14my a striv troha'n peul-diwedh rag gober an galow yn-bann a Dhuw yn Krist Yesu. 15An re ahanan ytho yw gwrys perfydh, prederyn hemma; ha mar prederowgh ken, hemma ynwedh Duw a dhiskwedh dhywgh. 16Byttegyns gwren ni kerdhes y'n keth savon a attaynsyn seulabrys.

17Gwrewgh war ow lergh, a vreder, ha notyewgh an re a gerdh yndella, kepar dell on ni ensampel dhywgh. 18Rag lies den a gerdh, a neb my a leveris dhywgh yn fenowgh, hag y lavarav lemmyn owth oela, aga bos eskerens a'n grows a Grist. 19Aga diwedh yw diswrians, aga duw yw an dorr, hag yma aga glori yn aga meth, gorrys aga brys war daklow an dor. 20Rag yma agan sita y'n nevow, ha ni a wayt gans mall Selwador dhiworti, an Arloedh Yesu Krist, 21neb a wra treylya agan korf uvel dhe gorf kehaval dhe'n korf a'y splannder, dre oberyans y alloes dhe worra pup-tra yn-danno ev.