Kusul ha Kennerth

1Ytho, ow breder garadow, ha my hirethek war agas lergh, ow lowena ha'm kurun, sevewgh fast yndella y'n Arloedh, a garadowyon. 2My a bys Ewodyas ha my a bys Syntyke a vos a'n keth brys y'n Arloedh. 3Dhe wir, my a'th pys ynwedh, a yew-was len, may hweressi an benynes a lavuryas genev y'n aweyl, gans Klemens ynwedh ha'm kesoberoryon erell, neb usi aga henwyn y'n lyver a vewnans.

4Lowenhewgh pup-prys y'n Arloedh; arta y lavarav, lowenhewgh. 5Agas klorder bedhes aswonnys dhe bub den oll. Ogas yw an Arloedh. 6Na vedhewgh prederus a dravyth mes yn pup-tra, dre bysadow ha govynnadow gans grasyans, bedhes an taklow a wovynnsowgh godhvedhys dhe Dhuw. 7Ha kres Duw a dremen pub konvedhes a wra gwitha agas kolonn ha'gas brys yn Krist Yesu.

8Wor'tiwedh, a vreder, pypynag a vo gwir, pypynag a vo onest, pypynag a vo gwiryon, pypynag a vo glan, pypynag a vo plegadow, pypynag a vo gerys-da, mars eus vertu, mars eus gordhyans, prederewgh a'n taklow ma. 9Ha'n taklow a dhys'sowgh ha degemmeres ha klewes ha gweles ynnov, gwrewgh an re ma; ha'n Duw a gres a vydh genowgh.

Aswonnvos a Ro Tus Filippi

10Mes my a lowenhas yn feur y'n Arloedh, rag hwi dhe wul dh'agas preder a-dro dhymm dasvleujyowa – hwi a wre prederi yn hwir, mes nyns esa spas dhywgh. 11Nyns yw, my dhe gewsel a-dro dhe edhomm, rag my re dhyskas bos kontentys, pypynag a vo ow studh. 12My a woer an fordh dhe vos uvelhes, ha my a woer an fordh dhe balshe; pup-prys hag yn pup-tra my re dhyskas bos lenwys ha bos nownek, ha palshe ha bos yn esow. 13My a yll gul pup-tra dredho ev neb a re dhymm nerth.4:13 dredho ev neb a re dhymm nerth: War-lergh re a'n dornskrifow dre Krist neb a re dhymm nerth. 14Byttegyns, hwi a wrug yn ta, ow kevrenna y'm anken.

15Godhvydhewgh hwi ynwedh, a dus Filippi, yn dalleth an aweyl, pan yth yn-mes a Makedonia, na gevrennas genev eglos vyth y'n mater a ri ha degemmeres, marnas hwi yn unnsel. 16Rag yn hwir, hwi a dhannvonas dhe'm edhomm unnweyth ha diwweyth yn Thessalonika. 17Nyns yw my dhe hwilas an ro; mes my a hwila an frut owth ynkressya dh'agas reken. 18Pup-tra a'm beus hag y palshav; lenwys ov vy ow tegemmeres taklow dhiworthowgh der Epafroditus, sawer plegadow, sakrifis kemmeradow ha plegadow dhe Dhuw. 19Ha'm Duw a lenow oll agas edhomm herwydh y rychys yn splannder yn Krist Yesu. 20Lemmyn dh'agan Duw ha'gan Tas re bo gordhyans trank heb worfenn. Amen.

Salusyans Diwettha

21Salusewgh pub sans yn Krist Yesu. An vreder usi genev a's dynnergh. 22An syns oll a'gas dynnergh, dres oll an re usi yn mayni Sesar.

23Gras an Arloedh Yesu Krist re bo gans agas spyrys.4:23 War-lergh re a'n dornskrifow yma dhe dhiwedh an wers Amen.