Salusyans

1Powl, prisner a Grist Yesu ha Timothi agan broder,

Dhe Filemon, agan karadow ha'gan kesoberer, 2ha dhe Affia agan hwoer,1:2 agan hwoer: War-lergh re a'n dornskrifow an garadow. ha dhe Arghippus agan kessouder, ha dhe'n eglos y'th chi:

3Gras dhywgh ha kres dhiworth Duw agan Tas ha dhiworth an Arloedh Yesu Krist.

Grasyans ha Pysadow

4Prest yth aswonnav gras dhe'm Duw, pan borthav kov ahanas y'm pysadow, 5ow klewes a'th kerensa hag a'n fydh a'th eus y'n Arloedh Yesu hag orth an syns oll, 6ha my a bys1:6 ha my a bys: Nyns usi an geryow ma y'n tekst Greka. may fo kowethyans dha fydh mayn nerthek der aswonnvos oll an dader a'gan1:6 a'gan: War-lergh re a'n dornskrifow a'gas. beus yn Krist. 7Rag my a gavas meur a lowena ha konfort y'th kerensa, drefenn kolodhyon an syns dhe vos kennerthys dredhos, a vroder.

8Rakhenna, kyn fo dhymm bolder lowr yn Krist dhe worhemmynna dhis an pyth a dhegoedh, 9byttegyns rag kerensa gwell yw genev dha gonjorya, kepar dell ov vy, Powl, den koth ha lemmyn ynwedh prisner a Grist Yesu; 10ha my a'th pys rag ow mab, neb a dhineythis y'm kolmow, Onesimus, 11hag o seulabrys diles dhis mes lemmyn devri dhe les dhiso jy keffrys ha dhymmo vy. 12My re wrug y dhastannvon dhis, – an den ma, neb yw ow holodhyon ow honan. 13My a garsa y witha genev rag menystra dhymm, y'th le, yn kolmow an aweyl, 14mes ny vynnis gul travyth heb dha gummyas, ma na ve dha dhader konstrynys, mes a'th vodh. 15Martesen rakhenna y feu ev diberthys dhiworthis berr dermyn ma'n degemmerri bys vykken, 16dhe vos na fella keth mes moy es keth, broder karadow, kyns oll dhymmo vy, mes pygemmys moy dhiso jy y'n kig keffrys hag y'n Arloedh.

17Rakhenna, mar akontydh ow bos koweth, degemmer e kepar ha dell ve ev my ow honan. 18Mar kwrug ev kamm vyth er dha bynn po mars usi yn kendon dhis, gorr an kost dhymmo vy. 19My, Powl, re skrifas gans ow dorn ow honan, my a wra attyli – heb leverel dhis ty dhe vos dha honan yn kendon dhymmo vy! 20Ya, ow broder, re biv tylys genes y'n Arloedh. Hebaskha ow holodhyon yn Krist! 21Rag ow bos sur ty dhe vos gostydh, my re skrifas dhis ow kodhvos y hwredh moy es dell lavarav.

22Y'n keth termyn pareus gwestva ragov, rag my a wayt ow bos grontys dhywgh, der agas pysadow.

23Epafras, ow hesprisner yn Krist Yesu a wra dha salusi, 24kepar dell wra Mark, Aristarghus, Demas ha Luk, ow hesoberoryon.

25Gras an Arloedh1:25 an Arloedh: War-lergh re a'n dornskrifow agan Arloedh. Yesu Krist re bo gans agas spyrys.1:25 War-lergh re a'n dornskrifow yma dhe dhiwedh an wers Amen.