Pysadow Azaria y'n Fornes

1[24] Hag yth esens ow kerdhes a-dro yn kres an flammow, ow kana hymnys dhe Dhuw hag ow penniga an Arloedh.1:1 Y'n Septuagint an gwersow ma yw niverys Daniel 3:24-90. Treylys dhiworth tekst Theodotion. 2[25] Hag ow sevel yn-bann, Azaria a bysis yndellma, hag owth igeri y anow yn kres an tan, ev a leveris:

3[26] Benniges osta, A Arloedh, Duw agan tasow ha dhe vos gormelys:

ha glorifiys yw dha hanow bys vykken.

4[27] Rag ewn osta yn pup-tra a wrussys dhyn ni;

gwir yw oll dha wriansow, ha kompes yw dha fordhow,

hag oll dha vreusow yw gwir.

5[28] Breusow gwiryon re wrussys yn pup-tra oll a dhresys warnan,

ha war Yerusalem, sita sans agan tasow;

rag yn gwiryonedh ha breus ty re dhros warnan oll an taklow ma drefenn agan peghosow.

6[29] Rag ni re beghas ha terri dha lagha, ow treylya dhe-ves dhiworthis;

yn pup-tra ni re beghas yn feur.

7[30] Ny woslowsyn orth dha worhemmynnow,

na'ga gwitha, na gul dell worhemmynnsys dhyn, may pe da ragon ni.

8[31] Ha pup-tra a dhresys warnan,

ha pup-tra a wrussys dhyn ni,

yn gwirvreus y's gwrussys.

9[32] Ty a'gan ros yn diwleuv eskerens dhilagha, diskryjygyon pur a-has,

ha dhe vyghtern kammhynsek, an gwetha y'n norvys oll.

10[33] Ha lemmyn ny yllyn igeri agan ganow;

re dheuth bismer ha keredh dhe'th wesyon, ha dhe'n re a'th wordh.

11[34] A-barth dha hanow, na'gan gas yn tien,

ha na dorr dha gevambos.

12[35] Na dreyl dha dregeredh dhiworthyn,

a-barth Abraham dha garadow,

hag a-barth Ysak dha was,

hag a-barth Ysrael dha sans:

13[36] leversys dhedha, owth ambosa

ynkressya aga has kepar ha ster an nev

ha kepar ha'n tewes war an vorlann.

14[37] Rag ni, A Arloedh, re dheuth ha bos moy distyr es an kenedhlow oll,

ha dres isel on ni hedhyw yn oll an norvys drefenn agan peghosow.

15[38] Y'n termyn ma nyns eus dhyn na penntern, na profoes, na hembrenkyas,

nag offrynn leskys, na sakrifis, nag oblashyon, nag ynkys,

na tyller dhe wul offrynn a-dheragos, ha kavoes tregeredh.

16[39] Mes gans kolonn keudhesik ha gans spyrys uvel gas ni dhe vos degemmerys,

kepar dell ve gans offrynnow leskys a hordhes ha lodhnow,

hag avel deg-milyow a eyn tew;

17[40] yndella re bo agan sakrifis gwrys a-dheragos hedhyw,

ha gront may hwryllyn dha holya oll yn tien;

rag ny vydh konfondys an re a worr aga threst ynnos.

18[41] Lemmyn ni a'th hol a leun golonn;

ni a'th own, ha hwilas dha fas.

19[42] Na wra agan shamya, mes dyght genen herwydh dha garadewder,

ha herwydh dha dregeredh meur.

20[43] Delirv ni ynwedh herwydh dha wriansow barthusek,

ha ro glori dhe'th hanow, A Arloedh;

21[44] ha gwra dhedha bos konfondys, oll an re a dhiskwedh droktra dhe'th wesyon,

ha perthens i meth yn oll aga nerth ha galloes,

ha re bo aga nell terrys.

22[45] Konvedhens ty dhe vos an Arloedh, an unn Duw,

gloryus dres oll an norvys.

Kan an Tri Mab

23[46] Lemmyn ny hedhi gwesyon an myghtern, neb a's tewlis ynni, toemmhe an fornes gans naftha ha pyg ha garrow lin ha kewydh; 24[47] ha'n flamm a frosas a-ugh an fornes naw kevelin ha dew-ugens, 25[48] hag omlesa, ha leski an Kaldeanys a veu kechys a-dro dhe'n fornes. 26[49] Mes el an Arloedh a dhiyskynnas y'n fornes war-barth gans an re a-dro dhe Azaria, ha fesya flamm an tan a-dhiworth an fornes; 27[50] ha gul dhe gres an fornes bos kepar dell esa gwyns leyth ow hwibana dredhi. Ny wrug an tan aga thochya mann, na'ga grevya na'ga throbla.

28[51] Ena, an tri kepar ha gans unn ganow a ganmolas ha glorifia ha benniga Duw y'n fornes, ow leverel,

29[52] Benniges osta, A Arloedh, Duw agan tasow:

ha dhe vos gormelys hag ughelhes dres oll bys vykken;

30ha benniges yw dha hanow gloryus ha sans;

ha dhe vos gormelys hag ughelhes dres oll bys vykken.

31[53] Benniges osta yn dha dempel sans ha gloryus:

ha dhe vos kanmelys ha glorifiys dres oll bys vykken.

32[55] Benniges osta neb a hwither an downderyow a-dhiwar dha se war an cherubim:

ha dhe vos gormelys hag ughelhes dres oll bys vykken.

33[54] Benniges osta war se dha vyghternsys:

ha dhe vos kanmelys hag ughelhes dres oll bys vykken.

34[56] Benniges osta y'n ebron a nev:

ha dhe vos kanmelys ha glorifiys bys vykken.

35[57] Bennigewgh an Arloedh, oll hwi oberow an Arloedh:

kanmelewgh ev hag ughelhewgh ev dres oll bys vykken.

36[59] A hwi nevow, bennigewgh an Arloedh:

kanmelewgh ev hag ughelhewgh ev dres oll bys vykken.

37[58] A hwi eledh an Arloedh, bennigewgh an Arloedh:

kanmelewgh ev hag ughelhewgh ev dres oll bys vykken.

38[60] A hwi dhowrow oll a-ugh an nev, bennigewgh an Arloedh:

kanmelewgh ev hag ughelhewgh ev dres oll bys vykken.

39[61] Bennigewgh an Arloedh, hwi botestas oll:

kanmelewgh ev hag ughelhewgh ev dres oll bys vykken.

40[62] A hwi howl ha loer, bennigewgh an Arloedh:

kanmelewgh ev hag ughelhewgh ev dres oll bys vykken.

41[63] A hwi ster an nev, bennigewgh an Arloedh:

kanmelewgh ev hag ughelhewgh ev dres oll bys vykken.

42[64] Bennigewgh an Arloedh, A bub kowas ha gluth:

kanmelewgh ev hag ughelhewgh ev dres oll bys vykken.

43[65] A hwi wynsow oll, bennigewgh an Arloedh:

kanmelewgh ev hag ughelhewgh ev dres oll bys vykken.

44[66] A hwi dan ha toemmder bennigewgh an Arloedh:

kanmelewgh ev hag ughelhewgh ev dres oll bys vykken.

45[67] A hwi yeynder ha toemmder, bennigewgh an Arloedh:

kanmelewgh ev hag ughelhewgh ev dres oll bys vykken.

46[68] A hwi luthow ha kowasow a ergh, bennigewgh an Arloedh:

kanmelewgh ev hag ughelhewgh ev dres oll bys vykken.

47[71] A hwi nosow ha dydhyow, bennigewgh an Arloedh:

kanmelewgh ev hag ughelhewgh ev dres oll bys vykken.

48[72] A hwi wolow ha tewlder, bennigewgh an Arloedh:

kanmelewgh ev hag ughelhewgh ev dres oll bys vykken.

49A hwi rew ha yeynder, bennigewgh an Arloedh:

kanmelewgh ev hag ughelhewgh ev dres oll bys vykken.1:49 Nyns eus gwersyow 49 ha 50 yn tekst Theodotion.

50A hwi loesrewyow hag ergh, bennigewgh an Arloedh:

kanmelewgh ev hag ughelhewgh ev dres oll bys vykken.

51[73] A hwi lughes ha kommol, bennigewgh an Arloedh:

kanmelewgh ev hag ughelhewgh ev dres oll bys vykken.

52[74] Benniges an norvys an Arloedh:

kanmeles ev hag ughelhes ev dres oll bys vykken.

53[75] A hwi venydhyow ha breow, bennigewgh an Arloedh:

kanmelewgh ev hag ughelhewgh ev dres oll bys vykken.

54[76] A bup-tra a dyv war an dor, bennigewgh an Arloedh:

kanmelewgh ev hag ughelhewgh ev dres oll bys vykken.

55[77] A hwi fentynyow, bennigewgh an Arloedh:

kanmelewgh ev hag ughelhewgh ev dres oll bys vykken.

56[78] A hwi voryow hag avonyow, bennigewgh an Arloedh:

kanmelewgh ev hag ughelhewgh ev dres oll bys vykken.

57[79] A hwi vorviles, ha pup-tra eus ow kwaya y'n dowrow, bennigewgh an Arloedh:

kanmelewgh ev hag ughelhewgh ev dres oll bys vykken.

58[80] A hwi oll ydhyn an ayr, bennigewgh an Arloedh:

kanmelewgh ev hag ughelhewgh ev dres oll bys vykken.

59[81] A hwi vestes ha bughes, bennigewgh an Arloedh:

kanmelewgh ev hag ughelhewgh ev dres oll bys vykken.

60[82] A hwi vebyon dus, bennigewgh an Arloedh:

kanmelewgh ev hag ughelhewgh ev dres oll bys vykken.

61[83] A Ysrael, bennigewgh an Arloedh:

kanmelewgh ev hag ughelhewgh ev dres oll bys vykken.

62[84] A hwi oferysi an Arloedh, bennigewgh an Arloedh:

kanmelewgh ev hag ughelhewgh ev dres oll bys vykken.

63[85] A hwi wesyon an Arloedh, bennigewgh an Arloedh:

kanmelewgh ev hag ughelhewgh ev dres oll bys vykken.

64[86] A hwi spyrysyon hag enevow a'n re wiryon, bennigewgh an Arloedh:

kanmelewgh ev hag ughelhewgh ev dres oll bys vykken.

65[87] A hwi dus sans hag uvel agas kolonn, bennigewgh an Arloedh:

kanmelewgh ev hag ughelhewgh ev dres oll bys vykken.

66[88] A Hanania, Azaria ha Mishael, bennigewgh an Arloedh:

kanmelewgh ev hag ughelhewgh ev dres oll bys vykken.

Rag ev re'gan delivras dhiworth ifarn,

ha'gan sawya dhiworth leuv ankow,

ha'gan delivra dhiworth kres an fornes ha'n flamm ow leski:

dhiworth kres an tan y hwrug ev agan delivra.

67[89] Rewgh grasyans dhe'n Arloedh, drefenn ev dhe vos da;

rag y dregeredh a dhur bys vykken.

68[90] Hwi oll neb a wordh an Arloedh, bennigewgh an Duw a dhuwow,

kanmelewgh ev ha rewgh grasyans dhodho:

rag y dregeredh a dhur bys vykken.1:68 An tekst a bes yn Dan 3:24.