Askrif Gormola

1A Arloedh Ollgalloesek,

Duw agan tasow,

Duw Abraham, Ysak ha Yakob

ha'ga henedh gwiryon;

2ty neb re wrug nev ha nor

gans aga splannder oll,

3neb re gargharas an mor dre er dha worhemmynn;

neb re geas an downvor

ha'y selya dre dha hanow euthyk ha gloryus;

4yma pup-tra ow krena

hag ow tegrena a-dherag dha nerth,

5rag ny yllir perthi meuredh dha glori,

ha ny yllir sevel orth sorr dha wodros erbynn peghadoryon;

6mes mersi dha ambos yw dres musur

ha dres hwithra,

7rag ty yw an Ughella Arloedh,

a druedh meur, leun a berthyans, leun a versi,

ow tiserri pan wodhev tus anfeus drefenn peghosow.1:7 Nyns eus remenant an wers yn re a dhornskrifow an Septuagint, mes yma y'n Syriek ha'n Vulgat.

Ty, A Arloedh, herwydh dha dhader meur,

re ambosas edrek ha gevyans

rag an re a begh er dha bynn,

hag yn dha versi heb fin

ty re apoyntyas edrek dhe beghadoryon

may fons i selwys.

8Rakhenna ty, A Arloedh, Duw an re wiryon,

ny apoyntsys edrek rag an re wiryon,

rag Abraham, Ysak ha Yakob, na beghas er dha bynn;

mes ty re apoyntyas edrek dhymmo vy, yw peghador.

9Rag niver an peghosow a wrug vy yw moy ages tewes an mor;

pals yw ow threuspassow, A Arloedh, pals yns,

ha nyns ov vy gwiw dhe vires ha gweles ughelder an nev

drefenn routh ow hammwriansow.

10Plegys yn-nans ov vy gans lies kadon a horn,

ma na allav drehevel ow fenn1:10 ma na allav drehevel ow fenn: Ow siwya an Syriek. drefenn ow feghosow,

ha nyns eus dhymm solas;

rag my re brovokyas dha sorr,

ha gul an pyth yw drog a-dheragos,

ow trehevel taklow kasadow, ha moghhe offensys.

Pysadow rag Gevyans

11Lemmyn ytho my a bleg glin ow holonn,

ow pysi warnas rag kuvder.

12My re beghas, A Arloedh, my re beghas,

ha my a aswonn ow hammwriansow.

13My a bys ha'th konjorya,

spar vy, A Arloedh, spar vy.

Na'm distru drefenn ow hammwriansow.

Na vydh serrys orthiv bys vykken, ow kwitha drogow er ow fynn;

na'm dampen vy a-berth yn rannow isella an norvys.

Rag ty, A Arloedh, yw Duw an re a goedh yn edrek,

14ha dhymmo vy ty a dhiskwa dha dhader;

rag ty a'm selow, anwiw dell ov, herwydh dha versi meur,

15ha my a'th wormel heb hedhi dres oll dydhyow ow bewnans.

Rag oll lu an nevow a gan dha wormola,

ha dhiso jy yw an glori trank heb worfenn. Amen.