1Lavarow koth Solomon, mab Davydh, myghtern Ysrael.

Raglavar

2Rag may fo dhe dus godhvos a furneth ha dyskans,

dhe dhissernya geryow poellek,

3degemmeres dyskans yn dyghtyans fur,

ewnder, gwirvreus hag ewnhynseth;

4rag may roller felder dhe'n re sempel,

godhvos ha doethter dhe'n gour yowynk

5An den fur a woslow hag ynkressya yn dyskans,

ha'n den a gonvedhes a gyv kevarwoedhyans;

6rag may konvettho lavar koth ha parabolenn,

geryow an re fur ha'ga lavarow tewl.

7Own an Arloedh yw an dalleth a wodhvos;

fellyon a skorn furneth ha dyskans.

Kusul dhe Wour Yowynk

8Klew, ow mab, dyskans dha das,

ha na skon dyskas dha vamm

9rag garlont teg yns i rag dha benn

ha torgh rag dha gonna.

10Ow mab, mar kwra peghadoryon dha dhynya,

na wra assentya.

11Mar leverons, ‘Deus genen, gwren kontrewaytya rag kavoes goes;

gwren ni skolkya dhe vaglenna an den gwiryon heb ken;

12avel ifarn, gwren ni aga daslenki yn few,

ha kowal, avel an re hag a dhiyskynn dhe'n pytt;

13ni a gyv oll pythow drudh,

ni a lenow agan chiow a breydh;

14towl dha brenn genen,

ni oll a'gan bydh unn pors’ –

15ow mab, na gerdh y'n fordh gansa,

tenn dha droes dhiworth aga hynsyow;

16rag aga threys a boen dhe dhroktra,

hag i a fysk rag skoellya goes.

17Rag euver yw an roes a lesir

y'n wel a edhen bynag;

18mes an re ma a gontrewayt rag aga goes aga honan,

i a skolk dhe vaglenna aga bewnans aga honan.

19Yndella yw fordhow pubonan hag yw hwansek dhe wayn anewn,

henna a denn dhe-ves bewnans an re a'n pew.

Furneth a Elow

20Furneth a gri yn ughel y'n stret,

yn plenys hi a dhrehav hy lev;

21dhe benn an tylleryow trosek hi a gri yn-mes,

a-rag yetow an sita hi a gews hy eryow:

22‘A hwi sempel, pes termyn y kerowgh hwi sempledh?

Pes termyn y fynn skornyoryon lowenhe yn aga skornya

ha fellyon kasa godhvos?

23Koelewgh orth ow heredh;

otta! my a dhinwa ow spyrys dhywgh,

my a wra ow geryow dhe vos godhvedhys genowgh.

24Drefenn my dhe elwel, ha hwi re naghas,

my re ystynnas ow leuv ha ny woslowas denvyth,

25ha hwi re dhispresyas oll ow husul

ha ny wrussowgh vri a'm keredh;

26my ynwedh, my a wra hwerthin orth agas terroes;

my a wra ges ahanowgh pan dheu skruth warnowgh,

27pan dheu skruth warnowgh avel tewedh,

ha'gas terroes a dheffo avel korwyns,

pan dheffo fienasow hag angoes warnowgh.

28Ena i a elow warnav, mes ny wrav vy gorthybi,

i a wra ow hwilas dihwans, mes ny'm kevons.

29Drefenn i dhe gasa godhvos,

ha ny dhewissons own an Arloedh,

30ny vynnens degemmeres ow husul,

hag i a skonyas oll ow heredh,

31ytho i a dheber froeth a'ga hyns,

ha bos lenwys a'ga thowlow aga honan.

32Rag an re sempel yw ledhys gans aga dislelder,

hag omfydhyans an fellyon a's distru;

33mes neb a woslow orthiv a wra triga yn sawder,

hag a vydh attes, heb euth a dhroktra.’