1Fals vantol yw tra gasadow dhe'n Arloedh,

mes poes ewn yw y dhelit.

2Pan dheu goeth, ena y teu meth,

mes gans tus uvel yma furneth.

3Glander an re ewnhynsek a's kevarwoedh,

mes kammder an re fals a's distru.

4Nyns eus prow a rychys yn dydh a sorr,

mes ewnder a dhelirv a ankow.

5Ewnder an re heb blam a wra aga fordh dhe vos kompes,

mes an tebelwas a goedh der y dhroktra y honan.

6Gwiryonder an re ewnhynsek a's delirv,

mes an falswesyon yw maglennys gans aga lust.

7Pan verow tebelwas, y wovenek a dheu dhe goll,

ha govenek an re dhidhuw a dheu dhe vann.

8An den gwiryon yw delivrys a boenvos

ha'n tebelwas a dheu a-bervedh ynno yn y le.

9Gans y anow an den didhuw a vynn distrui y gentrevek,

mes an re wiryon yw delivrys gans godhvos.

10Pan a hi yn ta gans an re wiryon, an sita a lowenha,

ha pan a an debeles dhe vann yma garmow a lowender.

11Dre vennath an re ewnhynsek sita yw ughelhes,

mes domhwelys yw gans ganow an debeles.

12Neb a dhispres y gentrevek a fyll a skians,

mes gour a gonvedhes a bes tawesek.

13Neb a gerdh a-derdro avel hwedhler a dhiskudh kevrinyow,

mes neb yw lel yn spyrys a with tra yn kudhys.

14Yn tyller ma nag eus gidyans, an bobel a fyll,

mes yn palster a gonseloryon yma sawder.

15Neb a re goestel rag estren a berth dregynn a'y wosa,

mes neb a skon goestla yw saw.

16Benyn a ras a's teves enor,

ha tus dhibita ny wayn marnas rychys.

17Gour yw kuv a wra dader dhodho y honan,

mes neb yw fell a dhre trobel dh'y gig y honan.

18Tebelwas a dhendil gober ansertan,

mes neb a has ewnder a'n jeves pewas sur.

19Neb yw fyrv yn ewnder a vew,

mes holya droktra a led dhe ankow.

20Tus a golonn dreus yw tra gasadow dhe'n Arloedh,

mes an re a fordhow divlam yw y dhelit.

21Bydh sur, ny vydh tebelwas heb kessydhyans,

mes an re wiryon a vydh delivrys.

22Avel bysow a owr yn troen hogh

yw benyn deg heb doethter.

23Hwans an re wiryon a dhiwedh pup-prys yn dader,

govenek an debeles yn sorr.

24Unn den a re heb lett, ha devedhys yw hwath moy rych,

onan arall a skon a ri hag a berth esow.

25Den hel a dhegemmer blonek,

ha neb a dhowrha a vydh dowrhes.

26Tus a volleth neb a syns greun dhodho y honan,

mes yma bennath war benn neb a's gwerth.

27Neb a hwila dader yn fen a gyv favour,

mes droktra a dheu dhe neb a'n hwila.

28Neb a drest yn y rychys a goedh,

mes an re wiryon a sewen avel del glas.

29Neb a dhre trobel war y deylu a erit gwyns,

ha'n den foll a vydh gwas dhe'n den fur.

30Froeth an den gwiryon yw gwydhenn a vewnans,

mes neb a wayn enevow yw fur.11:30 neb a wayn enevow yw fur: Po, ow siwya an Septuagint ha'n Syriek, freudh a gemmer bewnansow dhe-ves.

31Mars yw an den gwiryon rewardys war an norvys,

kemmys moy an tebelwas ha'n peghador!