1Neb a gar dyskybleth a gar godhvos,

mes neb a gas keredh yw talsogh.

2Den da a gyv favour gans an Arloedh,

mes gour a dhevisyow ev a dhampen.

3Ny yll den bos fastys gans droktra,

mes gwreydhenn an re wiryon ny vydh nevra removyes.

4Gwreg a vertu yw kurun hy gour,

mes neb a dhre mewl yw avel podredhes yn y eskern.

5Towlow an re wiryon yw ewn,

mes gidyans an debeles yw fals.

6Geryow an debeles a gontrewayt tus rag goes,

mes ganow an re ewnhynsek a's delirv.

7An debeles yw domhwelys ha nyns esons na fella,

mes chi an re wiryon a sev.

8Gour yw kommendys herwydh y dhoethter,

mes den a vrys treus yw dispresys.

9Gwell yw den a savla uvel, ha dhodho gwas,

ages onan hag a omwra den a vri ma nag eus dhodho bara.

10Den gwiryon a wra vri a vewnans y vest,

mes mersi tebeles yw fell.

11Neb a wonedh y dir a'n jevydh meur a vara,

mes neb a hol gweythresow euver ny'n jeves skians.

12Tour krev an debeles a dheu dhe vagor,

mes gwreydhenn an den gwiryon a sev fast.

13Tebelwas yw maglennys gans treuspass y dhiwweus,

mes an den gwiryon a dhienk a drobel.

14A froeth y anow gour a gyv y walgh a dhader,

hag ober diwleuv den a vydh attylys dhodho.

15Fordh den foll yw ewn yn y dhewlagas y honan,

mes den fur a woslow orth kusul.

16Sorr den foll yw diskwedhys a-dhistowgh,

mes den doeth ny wra vri a dhespit.

17Neb a re dustuni onest a gews an gwiryonedh,

mes fals dhustunier a gews toell.

18Kows dibreder yw avel strokosow a gledha,

mes taves tus fur a dhre yeghes.

19Gweusyow gwiryon a dhur bys vykken,

mes taves gowek a bes unn pols byghan.

20Yma toell yn kolonn an re hag a dhevis droktra,

mes an re a dewl kres a's teves joy.

21Ny hwer droktra vyth dhe'n re wiryon,

mes an debeles yw lenwys a drobel.

22Gweusyow gowek yw tra gasadow dhe'n Arloedh,

mes an re a omdheg yn lel yw y dhelit.

23Den doeth a gudh y wodhvos,

mes brys fellyon a dhyllo aga follneth.

24Leuv an dus dhiwysyk a reyn,

mes den diek a vydh gorrys dhe hwel krev.

25Prederi yn kolonn gour a boes warnodho,

mes ger da a'n lowenha.

26Den gwiryon yw kevarwoedher dh'y gentrevek,

mes fordh an debeles a's hembronk yn sowdhan.

27Ny wra an den diek rostya y breydh,

mes drudh yw pythow an den diwysyk.

28Y'n hyns a ewnder yma bewnans,

mes an fordh a gammwrians a hembronk dhe'n mernans.12:28 mes an fordh a gammwrians a hembronk dhe'n mernans: Ow siwya an Septuagint. Ebrow ha'n fordh yw hyns a anvarwoleth.