1An venyn fur a dhrehav hy chi,

mes follneth gans hy diwla hy honan a'n terr dhe'n dor.

2Neb a gerdh yn ewnhynseth a'n jeves own a'n Arloedh,

mes neb yw kamm y hynsyow a'n dispres.

3Kows den foll yw gwelenn dh'y geyn,

mes diwweus an re fur a's gwith.

4Yn tyller ma nag eus oghen, gwag yw an presep;

mes askorr pals a dheu gans nerth an ojyon.

5Ny wowlever dustunier lel,

mes fals dhustunier a dhiver gowyow yn-mes.

6Skornyer a hwila furneth ha ny's gyv,

mes godhvos yw es rag den a gonvedhes.

7Ke a-dhiworth lok gour foll,

rag ny gevydh godhvos war aga diwweus.

8Furneth den doeth yw dissernya y fordh,

mes follneth fellyon yw toell.

9Fellyon a wra ges a amendya kammweyth,

mes yn mysk an re ewnhynsek yma favour.

10An golonn a aswonn hy hwerowder hy honan,

ha nyns yw estren kevrennek a'y joy.

11Chi an debeles a vydh distruys,

mes tylda an re ewnhynsek a vleujyow.

12Yma fordh a hevel ewn dhe wour,

mes hy diwedh yw fordhow ankow.

13Yn hwarth hogen, an golonn yw trist,

ha diwedh joy yw anken.

14Den dislen yn y golonn a vydh attylys rag y fordhow,

mes gour da a vydh gobrys rag y weythresow.

15An den sempel a grys pup-tra,

mes an den doeth a breder a gammow y dhewdroes.

16Den fur yw war hag a dreyl dhiworth droktra,

mes an den foll a sorr heb fronn hag yth yw dibreder.

17Den yw tanek y natur a wra yn foll,

ha gour a vrasow yw kasadow.

18An den sempel a erit follneth,

mes an dhoethyon yw kurunys gans godhvos.

19An debeles a ombleg a-rag an re dha,

ha'n debeles orth yetow an den gwiryon.

20An boghosek yw kasadow gans y gentrevek hogen,

mes lies yw an re a gar an den rych.

21Neb a dhispres y gentrevek yw peghador,

mes gwynn y vys neb yw kuv orth an voghosogyon.

22An ny wandrons yn sowdhan an re a dhevis drog?

An re hag a dhevis da a gyv tregeredh ha gwirder.

23Yma gwayn yn pub lavur,

mes kows an dhiwweus ny led saw unnsel dhe esow.

24Kurun an re fur yw aga rychys,

mes follneth yw garlont14:24 garlont: Amendys. Cf. 1:9, 4:9. Ebrow follneth. an fellyon.

25Gwir dhustunier a saw enevow,

mes neb a gowlever yw toeller.

26Yn own an Arloedh y kevir fydhyans krev,

ha'y fleghes a's tevydh skovva.

27Own an Arloedh yw fenten a vewnans,

rag may haller avoydya maglennow ankow.

28Yma glori myghtern yn palster a boblans,

mes heb tus penntern yw diswrys.

29Gour neb yw lent ow serri a'n jeves konvedhes meur,

mes neb a sorr yn fysk a ughelha follneth.

30Kolonn gosel a re bewnans dhe'n kig,

mes avi a wra dhe'n eskern pedri.

31Neb a arwask den boghosek a arvedh y Wrier,

mes neb yw kuv dhe'n voghosogyon a'n enor.

32An tebelwas yw domhwelys der y dhroktra,

mes an den gwiryon a'n jeves harber yn y lander.14:32 yn y lander: Ow siwya an Septuagint. Ebrow yn y vernans.

33Furneth a bowes yn brys den a gonvedhes,

hag yth yw aswonnys hwath yn kolonn fellyon.14:33 hag yth yw aswonnys hwath yn kolonn fellyon: War-lergh an Septuagint ha'n Syriek, mes nyns yw aswonnys yn kolonn fellyon.

34Ewnder a ughelha kenedhel,

mes peghes yw meth dhe bobel bynag.

35Gwas neb a dhyght yn fur a'n jeves favour an myghtern,

mes y gonnar a goedh war neb a dhre mewl.