1Gorthyp medhel a dreyl konnar dhe-ves,

mes ger tynn a dhre sorr yn-bann.

2Taves tus fur a afin godhvos,

mes ganow an re foll a dhiver follneth.

3Yma dewlagas an Arloedh yn pub le,

ow koelyas war an debeles ha'n re dha.

4Taves medhel yw gwydhenn a vewnans,

mes kammder ynno a derr an spyrys.

5Den foll a skorn dyskybleth y das,

mes neb a hwither keredh yw doeth.

6Yn chi an den gwiryon yma meur a dresor,

mes gwayn an tebelwas a dhre anfeusi.

7Diwweus an re fur a les godhvos,

mes ny wra kolonn fellyon yndella.

8Sakrifis an debeles yw tra gasadow dhe'n Arloedh,

mes pysadow an re ewnhynsek yw y dhelit.

9Fordh an debeles yw tra gasadow dhe'n Arloedh,

mes ev a gar neb a hol ewnder.

10Yma dyskybleth tynn rag neb a forsak an hyns;

neb a gas keredh a verow.

11Yma ifarn hag Abaddon a-rag an Arloedh,

kemmys moy kolonn mebyon den.

12Ny gar skornyer bos keredhys;

ny vynn mos dhe'n dus fur.

13Kolonn lowen a wra min lowenek,

mes dre dristyns a'n golonn an spyrys yw trogh.

14Kolonn den a'n jeves konvedhes a hwither godhvos,

mes ganow fellyon a beur follneth.

15Oll dydhyow an den arweskys yw drog,

mes kolonn lowen a's teves gwledh heb fin.

16Gwell yw boghes gans own an Arloedh

ages tresor meur hag ankres ganso.

17Gwell yw sand a erbys may ma kerensa

ages ojyon peskys ha kas ganso.

18Gour konneryek a dhifun strif,

mes neb yw lent ow serri a goselha kedrynna.

19Fordh an den diek yw kepar ha perth a spern,

mes hyns an re ewnhynsek yw fordh-veur.

20Mab fur a wra tas lowen,

mes den foll a skorn y vamm.

21Follneth yw joy dhe neb na'n jeves skians,

mes gour a gonvedhes a gerdh yn ewn.

22Heb kusul towlow a dheu dhe vann,

mes gans kusulyoryon bals i a sewen.

23Gul gorthyp gwiw yw joy dhe wour,

ha ger yn y dermyn, ass yw da!

24Fordh bewnans a led yn-bann rag den doeth,

dh'y witha rag mos dhe ifarn a-woeles.

25An Arloedh a derr dhe'n dor chi an re woethus,

mes ev a venten orven an wedhwes.

26Tybyansow an tebelwas yw tra gasadow dhe'n Arloedh,

mes geryow grassyes yw plegadow dhodho.

27Neb yw kraf war-lergh gwayn anewn a wra trobel rag y deylu,

mes neb a gas falswobrow a vew.

28Brys an den gwiryon a ombreder fatell worthybir,

mes ganow an debeles a dhiver drogedhow.

29Yma an Arloedh pell dhiworth an debeles,

mes ev a glew pysadow an re wiryon.

30Golow an dewlagas a lowenha an golonn,

ha nowodhow da a re nerth dhe'n eskern.

31An skovarn hag a woslow orth keredh yaghus

a drig yn mysk an re fur.

32Neb a skorn dyskybleth a omdhispres,

mes neb a woslow orth keredh a gyv konvedhes

33Dyskans furneth yw own an Arloedh,

hag uvelder a dheu a-rag enor.