1Mab-den a bew towlow an golonn,

mes gorthyp an taves a dheu dhiworth Arloedh.

2Oll fordhow gour yw pur yn y dhewlagas y honan,

mes an Arloedh a vantol an spyrysyon.

3Kommytt dha ober dhe'n Arloedh,

ha'th towlow a vydh fastys.

4An Arloedh re wrug pup-tra rag porpos,

ynwedh an tebelwas rag dydh a derroes.

5Pub huni gans kolonn woethus yw tra gasadow dhe'n Arloedh;

bydh sur na vydh heb kessydhyans.

6Dre dregeredh ha lenduri yw kammweyth dasprenys,

ha der own an Arloedh den a omwith rag drog.

7Pan vo fordhow gour plegadow gans an Arloedh,

ev a wra may fo ynwedh y eskerens yn kres ganso.

8Gwell yw boghes gans gwiryonedh

ages gobrow meur gans kammhynseth.

9Brys den a dewl towl y fordhow,

mes an Arloedh a gevarwoedh kammow y dhewdroes.

10Yma erviransow dre dhewinieth war dhiwweus myghtern,

ny vydh y anow dislel erbynn gwirvreus.

11Yma mantol ha balansys a wirvreus dhe'n Arloedh,

oll an poesow yn y sagh yw ober y dhiwleuv.

12Tra gasadow yw dhe vyghternedh gul drog,

rag an tron yw fastys gans ewnder.

13Gweusyow gwiryon yw an delit a vyghtern,16:13 vyghtern: Ow siwya an Septuagint ha'n Vulgat. Ebrow vyghternedh.

hag ev a gar neb a gews dhodho an pyth yw ewn.

14Sorr myghtern yw kannas ankow,

ha gour fur a'n diserr.

15Yma bewnans yn golow fas myghtern,

ha'y favour yw haval dhe gommol a dheg glaw an gwenton.

16Ass yw gwell kavoes furneth ages owr,

ha gwell yw dewis konvedhes ages arghans!

17Fordh-veur an dus ewnhynsek a dreyl dhiworth drog;

neb a woel war y fordh a with y enev.

18Goeth a dheu kyns distruyans,

ha spyrys howtyn kyns koedh.

19Gwell yw bos uvel an spyrys gans an voghosogyon

ages kevrenna an preydh gans an re woethus.

20Neb yw doeth yn y negys a sewen,

ha gwynn y vys neb a drest y'n Arloedh.

21An den fur y golonn yw henwys den poellek,

ha hwekter an dhiwweus a ynkress dyskans.

22Doethter yw fenten a vewnans dhe neb a'n jeves,

mes keredh fellyon yw follneth.

23Kolonn an den fur a wra y anow doeth,

hag a geworr dyskans dh'y dhiwweus.

24Geryow teg yw avel kribenn vel,

hwekter dhe'n enev ha yeghes dhe'n eskern.

25Yma fordh a hevel bos ewn dhe wour,

mes hy diwedh yw an fordh dhe ankow.

26Ewl gweythor a wonedh ragdho,

y anow a'n ynni yn-rag.

27Gour koeg a balas drog,

ha war y dhiwweus yma kepar ha tan poeth.

28Gour treus a dewl strif a-les,

ha hwedhler a wra dibarth yntra keskowetha.

29Gour a freudh a dhyn y gentrevek,

hag ev a'n led yn fordh nag yw da.

30Neb a wynk gans y dhewlagas a dewl taklow treus,

neb a wask y dhiwweus war-barth a gowlwra droktra.

31Blew loes yw kurun a enor;

kevys yw y'n fordh a ewnder.

32Neb yw lent ow serri yw gwell ages gour galloesek,

ha neb a rewl y spyrys ages neb a gemmer sita.

33An prenn yw tewlys y'n varrlenn,

mes yma an ervirans gans an Arloedh y honan.