1Gwell yw krestennen sygh gans kosoleth

ages chi leun a gevewya gans strif.

2Keth neb a dhyght yn fur a rewl mab neb a dhre mewl,

hag ev a gevrenn an eretons yn mysk an vreder.

3An teudhlester yw rag arghans, ha'n forn yw rag owr,

mes an Arloedh a brev kolonnow.

4Drogoberer a woslow orth diwweus dhrog;

ha gowleveryas a re skovarn dhe daves dregynnus.

5Neb a skorn an boghosek a arvedh y Wrier;

neb a lowenha pan wel terroes tus erell ny vydh divlam.

6Fleghes wynn yw kurun an re goth,

ha glori mebyon yw aga thasow.

7Nyns yw kows fin gwiw dhe foll,

hwath dhe le kows gowek dhe bennsevik.

8Falswober yw haval dhe ven hudel yn dewlagas an riyas;

plepynag y treyl ev a sewen.

9Neb a av kammweythres a hwila kerensa,

mes neb a gews arta a'n mater a wra dibarth yntra keskowetha.

10Yth a keredh downa yn den a gonvedhes

ages kans strekys yn foll.

11Ny hwila tebelwas saw unnsel rebellyans,

mes kannas fell a vydh dannvenys er y bynn.

12Gwell yw dyerbynna orses ledrys hy orsigow,

kyns foll yn y follneth.

13Mar attal nebonan drog rag da,

nyns a drog nevra dhiworth y ji.

14Dalleth strif yw avel gasa dowr dhe skapya,

ytho gas an gedrynn kyns hi dhe dardha yn-mes.

15Neb a akwit an tebelwas ha neb a dhampen an den gwiryon,

aga dew yw tra gasadow dhe'n Arloedh.

16Prag yma an pris yn dorn foll rag prena furneth,

pan nag eus dhodho an golonn dh'y gavoes?

17Koweth a gar pup-prys,

ha broder yw genys rag gweres yn droglamm.

18Den heb skians a re goestel,

hag ev a dheu ha bos gaja rag y gentrevek.

19Neb a gar kammwrians a gar strif,

neb a dhrehav porth ughel a hwila distruyans.

20Ny sewen den a golonn gamm,

ha den ha dhodho taves treus a goedh yn anfeus.

21Neb a dhineyth mab gokki a'n jeves anken,

ha nyns eus joy dhe'n das a foll.

22Kolonn jolif yw sawment da,

mes spyrys trogh a sygh an eskern.

23Tebelwas a dhegemmer falswober a'n askra,

rag kammdreylya hynsyow gwirvreus.

24Yma furneth a-rag fas an den a gonvedhes,

mes yma dewlagas foll war bennow an norvys.

25Mab foll yw anken dh'y das,

ha hwerowder dhedhi hi neb a'n omdhuk.

26Nyns yw da beghya spal war den gwiryon;

skorjya tus nobyl yw kamm.

27Neb a fronn y eryow a'n jeves godhvos;

ha neb a'n jeves spyrys kosel yw gour a gonvedhes.

28Den foll a dew hogen yw synsys dhe vos fur;

pan dhege y dhiwweus, ev yw breusys dhe vos poellek.