1Den diberthys dhiworth kowetha a hwila ragskeusow,

ow strivya erbynn pub kusul len.

2Ny lowenha foll yn konvedhes,

mes unnsel ow tiskwedhes brys y golonn y honan.

3Pan dheu droktra, y teu bismer ynwedh;

ha gans disenor y teu mewl.

4Geryow ganow gour yw dowrow down,

fenten a furneth yw gover ow resek.

5Nyns yw da diskwedhes faverans dhe debelwas,

na herdhya den gwiryon dhe-ves dhiworth gwirvreus.

6Diwweus foll a dhre strif,

ha'y anow a elow rag skorjya.

7Ganow foll yw y dhiswrians,

ha'y dhiwweus yw antell dh'y enev y honan.

8Geryow hwystrer yw haval dhe demmigow sawrek;

i a yn-nans dhe'n rannow a-bervedh.

9Neb yw lows yn y ober

yw broder dhe neb a dhistru.

10Hanow an Arloedh yw tour krev,

an den gwiryon a boen a-bervedh ynno hag yw saw.

11Pythow an den rych yw y sita grev,

hag avel fos ughel yn y gonsayt y honan.

12Kyns droglamm, kolonn gour yw goethus,

mes uvelder a a-rag enor.

13Neb a worthyp kyns ev dhe glewes –

hemm yw follneth ha sham.

14Spyrys gour a berth kleves,

mes spyrys trogh, piw a yll y berthi?

15Brys poellek a gyv godhvos,

ha skovarn tus fur a hwila godhvos.

16Ro a wra spas rag an riyas,

hag a'n dre a-rag brasyon.

17Neb a brov y gen yn kynsa a hevel gwir,

bys pan dheffo an plentyas ha'y worthapposya.

18Tewlel prenn a worfenn disputyans,

hag ervira yntra gestrivoryon gevoethek.

19Broder hyll yw maga tiwedhyn avel sita grev,

ha kedrynna yw haval dhe varrys kastell.

20A froeth y anow gour yw lenwys;

gwalghys yw gans askorr y dhiwweus.

21Yma mernans ha bewnans yn galloes an taves,

ha keniver a'n karro a dheber y froeth.

22Neb a gyv gwreg a gyv tra dha,

hag ev a gyv favour a'n Arloedh.

23An den boghosek a hwila piteth,

mes an den rych a worthyp yn harow.

24Yma dhe wour kowetha a omwra bos kowetha,18:24 omwra bos kowetha: Amendys war-lergh an Syriek, an Vulgat ha'n Targum.

mes yma gwir goweth hag a len nes ages broder.