1Gwell yw den boghosek hag a gerdh yn ewnhynsek,

ages den yw treus yn y gows hag yw foll.

2Nyns yw da rag den bos heb godhvos,

ha neb a fysk gans y dhewdroes a gyll y fordh.

3Follneth den a wra y fordh kamm,

ha'y golonn a serr orth an Arloedh.

4Rychys a wra kowetha nowydh pals,

mes den boghosek yw diberthys dhiworth y gentrevek.

5Nyns a fals dhustunier heb kessydhyans,

ha ny dhienk gowleveryas.

6Lies a hwila favour den hel,

ha pub huni yw koweth dhe wour a re rohow.

7Oll breder an boghosek a'n kas:

kemmys moy yth a y gowetha dhiworto.

Ev a's helgh gans geryow mes nyns esons i ena.

8Neb a'n jeves furneth a gar y enev y honan,

neb a with konvedhes a sewen.

9Nyns a fals dhustunier heb kessydhyans,

ha gowleveryas a dhe goll.

10Ny dhelledh foll dhe vewa yn studh a balster,

kemmys le keth dhe reynya war bennsevigyon.

11Skians da a wra den lent dhe serri,

hag yth yw glori dhodho skonya a aswonn kammwrians.

12Konnar myghtern yw avel lew owth usa,

mes y favour yw avel gluth war an gwels.

13Mab foll yw diswrians dh'y das,

ha'n kedrynna a wreg yw avel glaw ow devera heb fin dre do syger.

14Chi ha pythow yw eretons dhiworth tasow

mes gwreg poellek yw ro dhiworth an Arloedh.

15Sygerneth a dewl yn kosk down,

ha'n enev diek a berth nown.

16Neb a with an gorhemmynn a with y enev;

neb a dhispres y fordhow a verow.

17Neb yw grassyes orth an voghosogyon a re kendon dhe'n Arloedh,

hag ev a re dhodho attal y ober.

18Kessydh dha vab hedre vo govenek,

na sett dha golonn war y vernans.

19Den a gonnar meur a dal an spal,

rag mara'n delivrydh, re vydh ty dh'y wul arta.

20Goslow orth kusul ha degemmer dyskybleth,

rag ma' fo furneth rag an termyn a dheu.

21Lies yw an towlow a-ji dhe golonn gour,

mes porpos an Arloedh, henna a sev.

22An pyth a vynnir y gavoes yn den yw tregeredh,

ha den boghosek yw gwell ages gour gowek.

23Own an Arloedh a led dhe vewnans;

neb a'n jeves ev a bowes attes,

ny vydh ev ow perthi dregynn.

24An diek a worr y leuv y'n skudell,

ha ny vynn ev dri y leuv arta dh'y anow.

25Gwask skornyer ha'n den sempel a dhysk doethter;

keredh den a gonvedhes, hag ev a'n jevydh godhvos.

26Neb a arvedh y das, ha herdhya y vamm dhe-ves,

yw mab a wra meth hag a dhre mewl.

27Mar astelydh, ow mab, goslowes orth dyskans,

ena yth edh yn stray dhiworth geryow godhvos.

28Dustunier koeg a wra ges orth gwirvreus,

ha ganow an debeles a lenk anewnder

29Dampnyans yw parys rag skornyoryon,

ha skorjya rag keyn fellyon.