1Gwin yw skornyer ha korev a wra tervans,

ha nyns yw fur neb yw kammledys gansa.

2Konnar euthyk myghtern yw avel lew owth usa,

neb a'n serr a gyll y vewnans.

3Gordhyans yth yw dhe wour omwitha dhiworth strif,

mes pub foll a vynn kedrynna.

4Ny aras an diek drefenn yeynder an kynyav;

y'n drevas ev a hwila, ha ny'n jeves travyth.

5Kusul yn kolonn gour yw avel dowr down,

mes gour a gonvedhes a'n tenn yn-bann.

6Lies den yw gelwys gour tregeredhus,

mes gour lel, piw a yll y gavoes?

7Den gwiryon a gerdh yn tivlam:

gwynnvys y fleghes war y lergh.

8Myghtern esedhys war y dron dhe vreusi

a wynsell oll droktra gans y dhewlagas.

9Piw a yll leverel, ‘My re wrug ow holonn glan;

pur ov a'm pegh’?

10Poesow divers ha musuryow divers,

an dhew yw tra gasadow dhe'n Arloedh.

11Yonker yw aswonnys der y weythresow,

mars yns i pur hag ewnhynsek.

12An skovarn ow klewes ha'n lagas ow kweles –

an Arloedh re's gwrug, aga dew.

13Na gar kosk, rag own ty dhe dhos dhe voghosogneth;

igor dha dhewlagas, ha ty a' fydh kals a vara.

14‘Drog, drog!’ yn-medh an prener,

mes pan a dhe-ves ev a vost.

15Yma owr, ha gemmow pals;

mes an dhiwweus a wodhvos yw jowel drudh.

16Kemmer dillasenn an den a's ros avel gaja rag estren;

syns an gaja re beu res rag estrenyon

17Bara kevys dre doell yw hweg dhe wour,

mes a-wosa an ganow a vydh leun a rowynn.

18Towlow yw fondys dre gusul;

gwra gwerrya dre gevarwoedhyans fur.

19Neb a gerdh a-dro avel hwedhler a dhiskudh kevrinyow;

ytho na vydh keskoweth gans klappyer.

20Neb a volleth y das po y vamm,

y lugarn a vydh difeudhys yn tewlder down.

21Eretons kevys yn uskis y'n dalleth,

ny vydh bennath war y dhiwedh.

22Na lavar, ‘My a attal drog’;

gorta an Arloedh hag ev a'th saw.

23Poesow divers yw tra gasadow dhe'n Arloedh

ha nyns yw da fals vantol.

24Kammow gour yw ordenys gans an Arloedh,

ytho fatell yll den konvedhes y fordh y honan?

25Antell yw rag den ev dhe leverel ‘Sans yw!’ yn tibreder,

ha prederi a'n ambos a-wosa.

26Myghtern fur a wynsell an debeles,

hag ev a dhre an ros warnedha.

27Spyrys den yw lugarn an Arloedh

ow hwithra an rannow a-bervedh.

28Tregeredh ha gwirder a with an myghtern,

ha'y dron yw mentenys gans tregeredh.

29Glori gwer yowynk yw aga nerth,

mes splannder an re goth yw aga blew loes.

30Strokosow hag a woli a garth droktra dhe-ves,

ha boemmennow a lanha an rannow a-bervedh.