1Kolonn an myghtern yw gover a dhowr yn leuv an Arloedh;

ev a's treyl pyle pynag y fynno.

2Pub fordh gour yw ewn yn y dhewlagas y honan,

mes an Arloedh a vantol an golonn.

3Gul ewnder ha gwirvreus

yw moy plegadow gans an Arloedh ages sakrifis.

4Lagasow howtyn ha kolonn woethus,

lugarn an debeles, yw pegh.

5Towlow an den diwysyk a hembronk yn sur dhe balster,

mes pub huni hag yw fysk a dheu dhe voghosogneth.

6Neb a gyv tresoryow gans taves gowek

yw anall hwythys a-dro, antell a ankow.

7Freudh an debeles a's skub dhe-ves,

drefenn i dhe skonya a wul an pyth yw ewn.

8Fordh an gour kablus yw kamm,

mes ober an den pur yw ewn.

9Gwell yw triga yn kornell a'n to

ages triga yn chi war-barth gans gwreg gavyllek.

10Enev an tebelwas a'n jeves hwans a dhrog;

ny gyv y gentrevek mersi yn y dhewlagas.

11Pan gessydhir an skornyer, an den sempel a dheu ha bos fur;

pan dhyskir an den fur, ev a dhegemmer godhvos.

12An den gwiryon a wra vri a ji an tebelwas;

ev a dhomhwel an debeles dhe derroes.

13Neb a dhege y dhiwskovarn orth kri an boghosek,

ev ynwedh a gri heb bos klewys.

14Ro yn-dann gel a dreyl sorr dhe-ves,

ha gober y'n askra a goselha konnar veur

15Joy yw dhe'n den gwiryon pan yw gwirvreus gwrys,

mes euth dhe dhrogoberoryon.

16Neb a wander dhiworth an fordh a gonvedhes

a wra powes yn kuntelles spyrysyon an re varow.

17Neb a gar plesour a berth esow;

neb a gar gwin hag oyl nevra ny vydh rych.

18An tebelwas yw daspren rag an den gwiryon,

ha'n den dislel rag tus ewnhynsek.

19Gwell yw triga y'n difeythtir

ages gans benyn gavyllek ha serrys.

20Yma tresor drudh hag oyl yn annedh an den fur,

mes den foll a'n gollenk.

21Neb a hol ewnder ha tregeredh

a gyv bewnans, ewnder hag enor.

22Unn den fur eth yn-bann erbynn sita a gasoryon,

ha dri dhe'n dor nerth hy fydhyans.

23Neb a with y anow ha'y daves

a with y enev orth troblow.

24An orgelus goethus, ‘Skornyer’ y hanow,

a omdheg gans balghder dres musur.

25Ewl an diek a'n ladh,

rag y dhiwla a skon a lavurya.

26Oll an jydh ev yw hwansek dhe voy,

mes an den gwiryon a re heb lett.

27Sakrifis an debeles yw tra gasadow;

kemmys moy pan y'n dro gans tebel borpos.

28Fals dhustunier a dhe goll,

mes gour hag a woslow yn ta a gews yn sewen.

29An drog wour yw tont y semlans,

mes an den ewnhynsek a breder y fordhow.

30Nyns eus na furneth, na konvedhes na kusul

a yll sevel erbynn an Arloedh.

31An margh yw darbarys rag dydh an gas,

mes yma an trygh dhe'n Arloedh.