1Pan esedhydh dhe dhybri gans rewlyas,

dissern dour an pyth usi a-ragos;

2ha gorr kollell dhe'th vryansenn

mars os den gans ewl a voes.

3Na yeun war-lergh boesow sawrek an rewlyas,

rag henn yw boes hag a doell.

4Na lavur re rag mayth ylli ha bos rych,

bydh fur, ha hedh.

5Pan wel dha dhewlagas rychys, gyllys yw,

rag distowgh ev a gemmer diwaskell dhodho y honan,

ow nija avel er war-tu ha'n ebron.

6Na dheber bara an den kraf;

na yeun war-lergh y voes sawrek;

7rag avel den ow rekna an kost, yndella yth yw.

‘Deber hag yv!’ yn-medh ev dhis,

mes, nyns usi y golonn genes.

8Ty a hwyj an temmik re dhyb'sys,

ha skoellys vydh dha geryow hweg.

9Na gews yn klewans foll,

rag ev a dhispres doethter dha eryow.

10Na dhile men-kov koth,

na enter yn parkow omdhivasow.

11Rag aga Dasprenyas yw krev;

ev a bled aga hen er dha bynn.

12Dro dha golonn dhe dhyskans,

ha'th skovarn dhe eryow a wodhvos.

13Na skon a ri dyskybleth dhe vaw;

mara'n gweskydh gans gwelenn, ny verow.

14Mara'n gweskydh gans an welenn,

ty a with y enev dhiworth ifarn.

15Ow flogh, mars yw dha golonn fur,

ow holonn ynwedh a vydh lowen.

16Ow diwloneth a lowenha

pan wra dha dhiwweus kewsel an pyth yw ewn.

17Na as dha golonn dhe berthi avi a beghadoryon,

mes bes yn own an Arloedh oll an jydh.

18Y fydh termyn ow tos yn surredi,

ha ny vydh dha wovenek treghys dhe-ves.

19Klew, ow mab ha bydh fur,

led dha golonn war an hyns ewn.

20Na vydh yn mysk an dus yw omres dhe win,

nag yn mysk an dus a dheber re a gig;

21rag an penn-medhow ha'n gargasenn a dheu dhe voghosogneth,

ha kosk a'n gwisk yn kloutys.

22Goslow orth dha das a'th tineythys,

ha na dhispres dha vamm pan vo hi koth.

23Pren gwiryonedh ha na'n gwerth,

pren furneth, dyskans ha konvedhes.

24Tas an den gwiryon a lowenha yn feur,

ha neb a dhineyth flogh fur a'n jevydh joy anodho

25Re bo dha das ha'th vamm lowen,

ha re lowenhaho neb a'th omdhuk.

26Ow mab, ro dhymmo vy dha golonn,

ha gwithes dha dhewlagas ow fordhow.

27Rag hora yw pytt down,

ha benyn estren yw puth ynn.

28Rag hi a gontrewayt avel lader,

hag a ynkress an avoutroryon yn mysk tus.

29Piw a'n jeves guw? Piw a'n jeves galar?

Piw a'n jeves kedrynnow?

Piw a'n jeves goliow heb acheson?

Piw a'n jeves dewlagas wythiek?

30An re hag a hok pell orth an gwin,

an re usi ow mos dhe assaya podigow a win kemmyskys.

31Na vir orth gwin pan yw rudh,

pan derlenter y'n hanaf,

ow mos yn-nans yn smodh.

32Y'n diwedh ev a vrath avel sarf,

hag a wan avel nader.

33Dha dhewlagas a wel taklow astranj,

ha'th kolonn a gews lavarow treus.

34Ty a vydh avel den a wrowedh yn kolonn an mor,

avel den a wrowedh war benn gwern.

35Ty a lever, ‘I a'm gweskis, mes ny berthis vy payn.

I a'm kronkyas, mes ny'n godhvev.

P'eur tifunav?

My a hwila diwes moy.’