1Na borth avi a dhrogoberoryon,

na borth hwans dhe vos gansa.

2Rag aga holonn a dhevis freudh,

ha'ga diwweus a gews a dhregynn.

3Gans furneth chi yw drehevys,

ha gans konvedhes yth yw fondys.

4Gans godhvos an stevellow yw lenwys

a rychys drudh ha teg a lies eghenn.

5Gour fur yw kreffa ages gour a nerth,

ha gour gans godhvos agesso ev neb a'n jeves galloes.

6Rag dre gevarwoedhyans y hyllydh gwerrya,

hag yma budhogoleth yn palster a gonseloryon

7Furneth yw re ughel rag den foll,

hag ny iger ev y anow y'n yet.

8Neb a dewl droktra

a vydh henwys gwrier a dhregynn.

9Towlow a follneth yw pegh,

ha'n skornyer yw tra gasadow dhe dus.

10Mars os gyllys digolonnek yn dydh a anken,

tanow yw dha nerth.

11Delirv an re yw draylys dhe-ves dhe'n mernans,

ha saw an re usi ow trebuchya troha dibennans.

12Mar leverydh, ‘Ny'n godhyen’,

a ny'n gwel ev neb a boes an kolonnow?

A ny'n goer ev neb a with dha enev?

A ny attal dhe dhen herwydh y oberow?

13Ow mab, deber mel, rag da yw;

mel dhiworth an gribenn yw hweg dhe'th stevnik.

14Yndella y fydh godhvos furneth dhe'th enev,

mara's kevydh, ty a' fydh gwaytyans ragos,

ha ny vydh dha wovenek treghys dhe-ves.

15Na gontrewayt kepar ha tebelwas ryb trigva an den gwiryon;

na wra pylla y bowesva.

16Rag den gwiryon a goedh seythgweyth ha sevel arta,

mes an debeles yw domhwelys gans droglamm.

17Na lowenha pan goedh dha eskar,

ha na as dha golonn dhe vos lowen pan drebuch,

18poken an Arloedh a'n gwell ha bos drok-pes,

ha treylya y sorr dhiworto.

19Na breder drefenn tus dhrog.

Na borth avi orth an dhrogoberoryon.

20Rag ny vydh dhe'n drogwas govenek rag an termyn a dheu.

Lugarn an debeles a vydh difeudhys.

21Ow mab, porth own a'n Arloedh ha'n myghtern,

ha na omvysk gans an eyl na'y gila.

22Rag aga therroes a dheu a-dhistowgh,

ha piw a woer an anfeusi a dheu dhiworta aga dew?

Lavarow Erell dhe'n re Fur

23Yma an re ma ynwedh dhe'n re fur.

Nyns yw ragvreusi da.

24Neb a lever dhe'n den kablus, ‘Ankablus os’,

a vydh milligys gans poblow, kuhudhys gans an kenedhlow.

25Mes dhe'n re a'n keredh, y fydh delit,

ha bennath da a dheu warnedha.

26Neb a re gorthyp ewn

a re dhis amm war an dhiwweus.

27Darbar dha ober a-ves,

ha'y bareusi ragos y'n park,

ha wosa henna drehav dha ji.

28Na vydh dustunier erbynn dha gentrevek heb acheson,

ha na gammled gans dha dhiwweus.

29Na lavar, ‘My a dhyght den arall par dell y'm dyght,

my a attal dhodho herwydh y weythres orthiv.’

30My a dremenas park gour diek,

ha lowarth gour diboell;

31hag ottava, gordevys o gans spern,

kudhys o gans linas,

ha'y fos a ven o terrys dhe'n dor.

32Ena my a welas ha prederi anodho dour,

my a viras warnodho ha dyski anodho.

33Nebes kosk, nebes hun,

nebes plegya an dhiwdhorn dhe bowes.

34Yndella y teu boghosogneth warnas avel brybour,24:34 avel brybour: Amendys war-lergh Lko 6:11.

hag esow avel gour ervys.