Moy Lavarow Koth a Solomon

1An re ma ynwedh yw lavarow koth a Solomon hag a veu dasskrifys gans gwer Hezekia myghtern Yuda.

2Glori Duw yw gwitha taklow kudhys,

mes glori myghternedh yw aga diskudha.

3Avel an ebron yn ughelder, avel an nor yn downder,

yndella dres hwithra yw kolonn myghternedh.

4Kemmer an plosedhes dhiworth an arghans,

hag yma dhe'n ser devnydh rag lester.

5Yndella kemmer an debeles dhiworth lok an myghtern,

ha'y dron a vydh fondys yn ewnhynseth.

6Na wra bostya a-rag myghtern,

ha na sav yn tyller ugheloryon.

7Gwell yw y fo leverys dhis, ‘Deus yn-bann omma’,

ages ty dhe vos gorrys isella.

An taklow a wrug dha dhewlagas aga gweles –

8na's dro yn fysk dhe'n vreuslys,

rag pandr'a wredh y'n diwedh

pan y'th sham dha gentrevek?

9Dadhel dha gen gans dha gentrevek y honan,

ha na dhiskudh kevrin den arall,

10poken nebonan neb a'th klew a dhre meth warnas,

ha ny vydh diwedh dhe'th drokhanow.

11Ger kewsys a-dermyn

yw haval dhe avalow a owr settys yn arghans.

12Avel skinenn a owr po tegenn a owr fin

yw keredh den fur dhe skovarn ow koslowes.

13Avel yeynder ergh yn dydh an drevas

yw kannas lel dhe'n re a'n dannvon;

ev a dhisygh spyrys y vestrysi.

14Avel kommol ha gwyns heb glaw

yw gour a vost a ro, heb y ri.

15Gans perthyans y hyllir dynya rewler,

ha taves medhel a yll terri eskern.

16Mar kevydh mel, deber kemmys a vydh lowr ragos,

poken, ow pos lenwys ganso, ty a'n hwyj.

17Gwayt may fo dha droes boghes venowgh yn chi dha gentrevek,

poken gyllys skwith genes ev a vydh, hag ev a'th kas.

18Fust, kledha po seth lymm

yw neb a dheg fals dhustuni erbynn kentrevek.

19Avel dans brew po troes klof

yw fydhyans yn den dislel y'n termyn a dhregynn.

20Avel onan a dhiwisk kweth yn dydh yeyn,

hag avel aysel dinewys war woli,25:20 woli: Amendys. Ebrow lisiw.

yw kaner a ganow dhe golonn drist.

21Mara'n jeves dha eskar nown, ro dhodho bara dhe dhybri,

ha mara'n jeves syghes, ro dhodho dowr dhe eva.

22Rag ty a raghell kolennow bew war y benn,

ha'n Arloedh a'th wober.

23Gwyns an gledhbarth a dhre glaw,

ha taves spitus a dhre semlans serrys.

24Gwell yw triga yn kornell a'n to

ages triga yn chi war-barth gans gwreg gavyllek.

25Avel dowrow yeyn dhe neb a'n jeves syghes,

yndella yw nowodhow da a vro bell.

26Avel fenten leysek po puth stronk

yw den gwiryon a ombleg dhe debelwas.

27Nyns yw da dybri meur a vel,

ha nyns yw glori tus dhe hwilas aga glori aga honan.

28Avel sita folsys hy fosow

yw den na'n jeves omvaystri.