1Na vost a-dro dhe a-vorow,

rag ny wodhes pandr'a dhre unn jydh.

2Gas dhe dhen arall dha wormel, a-der dha anow dha honan;

estren, a-der dha dhiwweus dha honan.

3Men yw poes ha tewes a'n jeves poesedh,

mes an negh gwrys gans foll yw poessa ages aga dew.

4Konnar yw fell ha sorr a feth,

mes piw a yll sevel orth avi.

5Keredh igor yw gwell

ages kerensa yn-dann gel.

6Lel yw goliow kar,

mes pals yw ammow eskar.

7Kas yw mel dhiworth an gribenn dhe neb yw leun,

mes dhe neb a'n jeves nown, pup-tra hwerow yw hweg.

8Avel edhen a wander a'y neyth

yw gour a wander a'y dyller.

9Melyseth ha frankynkys a wra an golonn lowen,

mes an enev yw terrys dhe demmyn gans govisyon.27:9 Amendys war-lergh an Septuagint.

10Na forsak dha goweth na koweth dha das;

ha na enter dhe ji dha vroder yn dydh dha derroes.

Gwell yw kentrevek eus yn ogas

ages broder eus pell.

11Bydh fur ow mab ha lowenha ow holonn,

rag may hylliv gorthybi dhe'n re a'm arvreus.

12An den doeth a wel peryll hag a omgudh,

mes an re sempel a yn-rag hag a be an pris.

13Kemmer dillasenn an den a's ros avel goestel rag estren;

syns hi avel gaja mar peu gwrys rag alyon.

14Neb a vennik y gentrevek gans lev ughel,

ow sevel myttin a-varr,

synsys vydh avel molleth.

15Deverans heb hedhi yn dydh glawek,

ha gwreg gavyllek yw kehaval.

16Hy fronna yw kepar ha fronna an gwyns,

po synsi olew y'n dhorn dhyghow.

17Horn a lymm horn,

yndella den a lymm skians den arall.

18Neb a with figbrenn a dheber y froeth,

ha neb a with y vester a vydh enorys.

19Dell dhastewynn dowr an fas,

yndella y hwra kolonn den dhe dhen arall.

20Ifarn hag Abaddon, nevra ny's teves lowr;

ha ny'n jeves dewlagas mab-den lowr.

21An teudhlester yw rag arghans, ha'n forn yw rag owr,

yndella yw gour prevys dre vos gormelys.

22Mar prewydh den foll yn morter

war-barth gans greun barlys gans hordh brewi,

nyns a y follneth dhiworto.

23Godhvydh yn ta studh dha flokkys;

sett dha golonn war an gever a'th eus.

24Rag ny bes tresor bys vykken,

na ny bes kurun a henedh dhe henedh.

25Pan yw gyllys an foen, ha'n aswels a dheu,

ha'n losow war an menydhyow re beu kuntellys,

26an eyn a brovi dha dhillas,

ha'n gever a brovi pris park.

27Y fydh leth lowr a'n gever rag dha voes,

ha rag boes dha deylu

ha sosten rag dha vaghtethyon.