1An debeles a fi dhe'n fo pan nag eus helghyas,

mes an re wiryon yw maga hardh avel lew.

2Pan wra gwlaskor rebellya

yma dhedhi lies rewler;

mes gans rewler poellek, adhyskys,

faster an wlaskor a bes.

3Gour boghosek hag a arwask an voghosogyon

yw avel glaw tynn na as trevas.

4An re a forsak an lagha a wormel an tebelwas,

mes an re yw gostydh dhe'n lagha a striv er aga fynn

5Ny gonvedh gwer dhrog gwirvreus,

mes an dus a hwila an Arloedh a gonvedh pup-tra oll.

6Gwell yw den boghosek a gerdh yn tivlam

ages bos kamm yn y fordhow, hag ev rych.

7Neb a with an lagha yw mab fur,

mes neb yw koweth gargasennow a dhre sham dh'y das.

8Neb a voghha y rychys der oker ha moghheans

a'n kuntell a-barth den arall a vydh hegar dhe'n voghosogyon.

9Mar treyl nebonan y skovarn ma na glewo an lagha,

y bysadow yw tra gasadow hogen.

10Neb a gammled an re ewnhynsek yn fordh vil

a goedh yn y bytt y honan,

mes an re dhinamm a gyv eretons da.

11An gour rych yw fur yn y dhewlagas y honan,

mes an den boghosek ha poellek a yll y dhiskudha.

12Pan yw an re wiryon fest heudhik, yma glori meur,

mes pan drygh an debeles tus a omgudh.

13Ny sewen neb a gudh y gammweythresow,

mes neb a's avow ha forsakya a'n jevydh mersi.

14Gwynnvys an den neb a'n jeves own pup-prys,

mes neb yw kales y golonn a goedh yn anfeus.

15Avel lew owth usa po ors owth omsettya

yw drog rewler war bobel boghosek.

16Rewler heb konvedhes a gyv dre nerth,

mes neb a gas gwayn anewn a'n jevydh bewnans hir.

17Den hag yw beghys gans skoellya goes neb den,

re hwillo skovva y'n pytt;

na res nagonan gweres dhodho.

18Neb a gerdh yn tivlam a vydh saw,

mes neb a hol fordhow kamm a goedh yn pytt.

19Neb a wonedh y dir a'n jevydh meur a vara,

mes neb a hol gweythresow euver a'n jevydh meur a voghosogneth.

20An gour a lenduri a'n jevydh meur a vennathow,

mes neb a fysk dhe vos rych ny vydh heb kessydhyans.

21Nyns yw ragvreusi da,

byttegyns a demmik a vara gour a gammwra.

22Gour pith a fysk dhe vos rych,

ha ny woer ev y teu boghosogneth warnodho.

23Neb a geredh den a gyv moy a favour a-wosa

ages an den a fekyl gans y daves.

24Neb a lader a'y das po a'y vamm

hag a lever, ‘Nyns yw henna kammweythres’,

yw keskoweth dhe dhen a dhistru.

25An den kraf a dhifun strif,

mes neb a drest y'n Arloedh a vydh golusegys.

26Neb a drest yn y golonn y honan yw foll,

mes neb a gerdh yn furneth a vydh saw.

27Neb a re dhe'n voghosogyon, ny'n jevydh edhomm,

mes neb a gudh y dhewlagas a'n jevydh mollothow pals.

28Pan drygh an debeles tus a omgudh,

mes pan verwons an re wiryon a ynkress.