Gwarnyans dhe Drestya yn Duw ha'y Enora

1Ow mab, na ankov ow dyskans,

gas dhe'th holonn gwitha ow gorhemmynnow;

2rag hirder a dhydhyow ha blydhynyow a vewnans

ha kres a vydh keworrys dhis.

3Na as tregeredh ha gwirder dhe'th forsakya,

kolm i a-dro dhe'th konna,

skrif i war legh dha golonn.

4Yndella ty a gyv gras ha sewenyans da

yn golok Duw ha densys.

5Trest y'n Arloedh gans oll dha golonn,

ha na fydh y'th konvedhes dha honan.

6Yn oll dha fordhow gwra y aswonn,

hag ev a wra dhe'th hynsyow bos kompes.

7Na vydh fur y'th tewlagas dha honan;

porth own a'n Arloedh, ha treyl dhiworth drog.

8Sawment vydh dhe'th vegel3:8 dhe'th vegel: Po war-lergh an Septuagint dhe'th korf.

ha sosten dhe'th eskern.

9Enor an Arloedh gans oll dha substans,

ha gans kynsa froeth a'th trevas;

10Ena dha skiberyow a vydh leun a balster,

ha'th kerynyow a vydh ow fenna gans gwin.

11Ow mab, na skorn dyskybleth an Arloedh,

na vydh skwithys gans y reprev,

12rag neb a wra an Arloedh y gara, ev a'n reprev,

dell wra an tas an mab ynno may kyv delit.

Gwir Rychys

13Gwynnvys an den hag a gyv furneth,

ha'n den hag a gyv konvedhes,

14rag an gwayn anedhi yw gwell ages an gwayn a arghans,

ha'y frow yw gwell ages owr fin.

15Druttha yw hi ages jowelys,

ha ny yll travyth a'th eus hwans anodho bos hevelebys dhedhi.

16Yma hirder dydhyow yn hy leuv dhyghow;

yn hy leuv gledh yma golusogneth hag enor.

17Hy fordhow yw fordhow a hwekter,

hag oll hy hynsyow yw kres.

18Gwydhenn a vewnans yw hi dhe'n re a's syns,

ha gwynn y vys neb a's dalghenn fast.

Furneth Duw y'n Kreasyon

19An Arloedh dre furneth a fondyas an norvys,

dre gonvedhes ev a selyas an nevow;

20der y skentoleth an downvoryow a dardhas yn-mes,

ha'n kommolennow a dhinwa gluth.

Gwir Sawder

21Ow mab, na as i dhe skapya a'th tewlagas:

gwith kusul len ha doethter,

22hag i a vydh bewnans rag dha enev,

ha gras dhe afina dha gonna.

23Ena ty a gerdh war dha fordh yn sawder,

ha ny drebuch dha droes.

24Mar krowedhydh, ny vydhydh ownek;

pan wrowedhydh, dha gosk a vydh hweg.

25Na borth own a skruth distowgh,

nag a dhiswrians a dheu war an debeles;

26rag an Arloedh a vydh dha fydhyans,

hag ev a with dha droes rag bos maglennys.

27Na skon dader dhiworth an re y tylir dhedha,

pan y'th eus galloes dh'y wul.

28Na lavar dhe'th kentrevek, ‘Ke, ha deus arta,

hag a-vorow my a'n re’ – pan usi an dra genes.

29Na dowl drog erbynn dha gentrevek,

hag ev trigys rybos yn fydhyans.

30Na genki orth den heb ken,

pan na wrug dha aperya.

31Na borth avi orth gour a arowder,

ha na dhewis fordh bynag a'y fordhow;

32rag an den gorth yw tra gasadow dhe'n Arloedh,

mes yma y gevrin gans an re ewnhynsek.

33Yma molleth an Arloedh war ji an drogoberer,

mes ev a vennik annedh an re wiryon.

34Orth an skornyoryon, ev a berth skorn,

mes dhe'n re uvel ev a dhiskwa favour.

35An re fur a erit enor,

mes an fellyon a's tevydh bismer.