Lavarow Agur

1Lavarow Agur mab Yake. Dargan an gour ma dhe Ithiel, dhe Ithiel hag Ukal.

2Re dalsogh ov yn sur dhe vos gour;

Ny'm beus konvedhes denel.

3Ny dhyskis furneth,

na ny'm beus godhvos a'n Sans.

4Piw a yskynnas dhe nev hag a dhiyskynnas?

Piw a guntellas an gwyns yn palv y dhorn?

Piw a vaylyas an dowrow yn dillasenn?

Piw a fondyas oll pennow an norvys?

Pyth yw y hanow, ha pyth yw hanow y vab?

Yn sur, ty a woer!

5Pub ger a Dhuw yw purhes,

skoes ywa dhe'n re a hwila skovva ynno.

6Na geworr travyth dh'y eryow,

poken ev a'th keredh ha ty a vydh prevys gowek.

7Dew dra a bysav dhiworthis;

na's nagh dhymmo vy kyns my dhe verwel:

8Gorr pell dhiworthiv falsuri ha gow,

na ro dhymmo vy naneyl boghosogneth na rychys;

mag vy gans an boes anodho ma'm beus edhomm,

9poken lenwys vydhav hag y'th naghav

hag y lavarav, ‘Piw yw an Arloedh?’

Po y fydhav boghosek ha ladra,

ha disakra hanow ow Duw.

10Na sklander gwas dh'y vester,

poken an gwas a'th volleth ha ty a vydh synsys kablus.

11Yma re hag a volleth aga thas

ha na vennik aga mamm.

12Yma re yw pur yn aga dewlagas aga honan,

mes nyns yns i glanhes a'ga fodredhes.

13Yma re – ass yw ughel aga dewlagas,

ass yw kroghen aga dewlagas drehevys ughel!

14Yma re, mayth yw aga dyns kledhedhyow,

hag avel kellylli yw aga diwen

dhe dhybri an voghosogyon a-dhiwar an norvys,

an edhommogyon dhiworth mab-den.

15Yma gel ha dhedhi diw vyrgh,

‘Ro, ro’, i a gri.

Yma tri thra na gyv lowr nevra;

yma peswar tra na lever nevra, ‘Lowr’:

16ifarn, torr wownagh,

dor nag yw gwalghys nevra a dhowr

ha'n tan na lever nevra, ‘Lowr.’

17An lagas hag a dhispres tas

hag a skorn bos gostydh dhe vamm

a vydh pigys yn-mes gans marghvrini an nans

ha dybrys gans an eryon.

18Yma tri thra yw re varthys ragov,

peswar na'm beus aga honvedhes:

19fordh er y'n ebron,

fordh sarf war garrek,

fordh gorhel war an keynvor,

ha fordh gour gans mowes.

20Hemm yw fordh avoutres:

hi a dheber hag a sygha hy ganow

ha leverel, ‘Ny wrug vy drog vyth.’

21Yn-dann dri thra an norvys a dhegren,

yn-dann peswar ny'n jeves sevel:

22keth pan a ha bos myghtern,

foll pan yw gwalghys a voes;

23benyn nag yw kerys pan gyv hi gour,

ha maghteth pan gyv hi le hy mestres.

24Yma peswar tra y'n norvys yw byghan,

mes fur dres eghenn yth yns:

25an moryon yw pobel nag yw krev,

byttegyns i a guntell boes y'n hav;

26an broghes yw pobel heb galloes,

byttegyns i a wra aga annedhow y'n karregi.

27Ny's teves an lokustes myghtern,

byttegyns i oll a geskerdh rynnys yn bagasow;

28y hyllir synsi pedresyf y'n dorn,

byttegyns kevys yw yn palesyow myghternedh.

29Tri thra yw teg yn aga herdhes,

peswar yw teg yn aga gwayans:

30an lew hag yw an kreffa yn mysk bestes gwyls

ha na fi dhe'n fo a-rag onan anedha;

31an kulyek ow payoni, an bogh,

ha myghtern gans y lu a-dro dhodho.30:31 gans y lu a-dro dhodho: Styr an Ebrow yw ankler.

32Mars es foll, owth omughelhe,

mars eses ow tevisya drog,

gorr dha dhorn war dha anow.

33Rag par dell dreyloubir leth rag gul kowles,

ha dell weskir an troen dhe wul goes,

yndella movya sorr a wra strif.