Dyskas Mamm Myghtern Lemuel

1Lavarow myghtern Lemuel, dargan a dhyskas y vamm dhodho.

2Pandra, ow mab? Pandra, mab ow thorr?

Pandra, mab ow ambosow?

3Na ro dha nerth dhe venynes,

na dha fordhow dhe'n pyth a dhiswra myghternedh.

4Ny dhelledh dhe vyghternedh, a Lemuel,

ny dhelledh dhe vyghternedh eva gwin,

po rewloryon dhe yeuni war-lergh korev;

5poken i a yv hag ankevi an taklow a veu ordenys,

hag a gammdreyl gwir an voghosogyon.

6Ro korev dhe'n re usi yn eneworres,

ha gwin dhe'n re usi yn hwerowder an enev.

7Evens hag ankevi aga boghosogneth,

ha perthi kov a'ga ahwer na fella.

8Igor dha anow a-barth an den avlavar,

rag gwir an re yw gorrys yn anles.

9Igor dha anow, breus yn ewn,

ha pled ken an edhommek ha'n boghosek.

Gwreg Dha

10Gwreg abel, piw a yll hy havoes?

Hy bri yw druttha ages koral.

11Kolonn hy gour a's teves fydhyans ynni,

ha ny fyll gwayn vyth dhodho.

12Hi a dhiskwedh da dhodho, a-der drog,

oll dydhyow hy bewnans.

13Hi a hwila gwlan ha lien,

hag a ober gans diwleuv volonjedhek.

14Hi yw avel gorholyon an marchont,

hi a dhre hy boes a dylleryow pell.

15Hi a sev yn-bann pan yw hwath nos,

hag a bareus boes rag hy theylu,

hag oberennow rag hy maghtethyon.

16Hi a ombreder a-dro dhe bark ha'y brena;

gans gober hy diwleuv hi a blans gwinlann.

17Hi a wrogys hy diwglun gans nerth,

hag a wra may fo hy diwvregh krev.

18Hi a surha bos gwayn da dh'y henwerth;

ny vydh hy lugarn difeudhys nosweyth.

19Hi a worr hy diwleuv dhe'n gygel,

ha'y diwleuv a syns an werthys.

20Hi a iger hy leuv dhe'n voghosogyon,

hag ystynn hy diwleuv dhe'n edhommogyon.

21Ny's teves hi own rag hy theylu pan wrer ergh,

rag oll hy theylu yw gwiskys yn pann kogh.

22Hi a wra rygdhi hy honan kolghesow,

hy dillas yw sendal ha purpur.

23Hy gour yw aswonnys yn yetow an sita,

pan esedh yn mysk henavogyon an tir.

24Hi a wra dillasennow a lin hag a's gwerth;

hi a brovi grogysyow dhe'n varchons.

25Nerth ha dynita yw hy dillas,

ha hi a hwerth orth an termyn a dheu.

26Hi a iger hy ganow gans furneth,

hag yma an dyskans a dregeredh war hy thaves.

27Hi a with war negys hy theylu,

ha ny dheber an bara a dhiekter.

28Hy fleghes a sev hag a's henow gwynnvys,

ha'y gour ynwedh, hag ev a's gormel:

29‘Lies benyn re wrug yn ta,

mes ty re's tremenas oll.’

30Gras a doell, ha tekter yw euver,

mes benyn a berth own a'n Arloedh yw dhe vos gormelys.

31Ro dhedhi rann a froeth hy diwleuv,

ha re's gormello hy oberennow y'n yetow.