Kusul Tas

1Klewewgh, a vebyon, dyskans tas,

ha goslowewgh may kyffowgh konvedhes.

2Rag my a re dhywgh dyskas da;

na esewgh ow dyskans.

3Pan en vy mab gans ow thas,

tender, ha'n unn vab yn golok ow mamm,

4ev a'm dyski hag a leveri dhymm,

‘Gas dhe'th kolonn synsi fast ow geryow;

gwith ow gorhemmynnow, ha bewa.

5Kav furneth, kav konvedhes:

na ankov, ha na dreyl dhiworth geryow ow ganow.

6Na's gas, ha hi a'th with; kar hi,

ha hi a wra goelyas warnas.

7Dalleth furneth yw hemma; kav furneth,

ha pypynag a gyffi, kav konvedhes;

8Gwra hy chershya, ha hi a'th ughelha;

hi a vynn dha enora mara's byrlydh.

9Hi a worr war dha benn garlont teg,

hi ri dhis kurun deg.’

Gwarnyans dhe Omwitha y'n Fordh Ewn

10Klew, ow mab, ha degemmer ow geryow,

may fo blydhynyow dha vewnans lies.

11My re dhyskas dhis an fordh a furneth;

my re'th hembronkas yn hynsyow ewnhynseth.

12Pan gerdhydh, ny vydh dha gerdhes lettys;

ha mar poenydh, ny drebuchydh.

13Syns fast dyskans, na as ev dhe vos dhe wari;

gwith e, rag ev yw dha vewnans.

14Na enter hyns an dhrogoberoryon,

ha na gerdh yn fordh an debeles.

15Gas hi, na a warnedhi,

treyl dhiworti ha tremen yn-rag.

16Rag ny yllons koska marnas i a wra drogober;

aga hosk yw kemmerys dhe-ves marnas i a wra dhe nebonan trebuchya.

17Rag i a dheber an bara a dhroktra,

hag eva an gwin a freudh.

18Mes hyns an re wiryon yw haval dhe wolow dydh-tardh,

hag a splann dhe splanna ha dhe splanna bys yn hanter-dydh.

19Fordh an debeles yw haval dhe dewlder down;

ny wodhons an pyth may trebuchons warnodho.

20Ow mab, goslow dhe'm geryow;

pleg dha skovarn dhe'm lavarow.

21Na gas i dhe skapya a'th tewlagas;

gwith i a-berth y'th kolonn.

22Rag bewnans yth yns dhe'n re neb a's kyv,

ha sawment dhe oll y gig.

23Gwith dha golonn gans oll hewoelder,

rag anedhi y teu dallethvaow bewnans.

24Gorr dhiworthis kammgows,

ha gorr kammder an dhiwweus pell dhiworthis.

25Mires dha dhewlagas poran war-rag,

ha sett kreghyn dha dhewlagas kompes a-ragos.

26Bydh war a hyns dha dhewdroes,4:26 Bydh war a hyns dha dhewdroes: Styr an Ebrow yw ankler; martesen Preder a hyns dha dhewdroes.

ena dha fordhow a vydh sur.

27Na dreyl, naneyl dhe'n dyghow na dhe'n kledh;

treyl dha droes dhe-ves a dhrog.