Gwarnyans erbynn Horys

1Ow mab, goslow dour orth ow furneth,

pleg dha skovarn war-tu ha'm kusul;

2rag may kyffi doethter,

ha rag may hwittho dha dhiwweus godhvos.

3Rag diwweus benyn estren a syger mel,

ha'y ganow yw moy smodh ages oyl;

4mes wor'tiwedh hi yw mar hwerow avel fuelenn,

mar lymm avel kledha dewvinyek.

5Hy threys a dhiyskynn dhe ankow,

ha'y hammow a led troha ifarn;

6Ny hwither hi an hyns a vewnans;

hy fordhow a wander, ha dibreder yw hi.

7Ha lemmyn, a vebyon, goslowewgh orthiv,

ha na dreylyewgh dhiworth geryow ow ganow.

8Gwith dha fordh pell anedhi,

ha na dheus nes dhe dharas hy chi;

9rag own ty dhe ri dha enor dhe re erell,

ha'th vlydhynyow dhe dhen fell;

10rag own estrenyon dhe vos lenwys a'th nerth,

ha'th lavuryow dhe vos yn chi alyon;

11hag orth diwedh dha vewnans yth hanasydh,

pan dheu dha gig ha'th korf dhe dhiwedh,

12ha ty a lever, ‘Assa wren vy kasa dyskybleth,

ha'm kolonn a dhispresyas keredh.

13Ny woslowsyn orth lev ow dyskadoryon,

na plegya ow skovarn dhe'n re a'm dyski.

14Nammnag en vy dres dhe dhroktra glan

yn mysk an bobel ha'n kuntelles.’

15Yv dowr a'th dowrargh dha honan,

dowr ow resek mes a'th puth dha honan.

16Na as dha fentynyow dhe fenna y'n stret,

na goverow a dhowr y'n plenys.

17Bedhens i ragos jy dha honan,

a-der rag an re estren usi genes.

18Benniges re bo dha fenten,

ha lowenha yn gwreg dha yowynkneth,

19ewik teg, gavrewiges rasek.

Re wrello hy diwvronn dha dhisygha pup-prys;

re bi medhow prest gans hy herensa.

20Prag yth osta kammledys, ow mab, gans benyn estren,

ha byrla diwvronn alyon?

21Rag yma fordhow gour a-rag dewlagas an Arloedh,

hag ev a hwither oll y hynsyow.

22An tebelwas yw maglennys gans y gammweythresow y honan,

hag ev a vydh synsys fast yn kerdyn y begh.

23Ev a verow drefenn fowt a dhyskybleth,

ha drefenn y follneth veur yth a yn stray.