Gwarnyans erbynn Follneth

1Ow mab, mar resys gaja rag dha gentrevek,

mar shaksys leuv yn goestel rag estren,

2mar peusta maglennys yn kows dha dhiwweus,

kechys yn geryow dha anow,

3ena gwra hemma, ow mab, hag omsaw,

rag deuves yn galloes dha gentrevek;

ke, bydh uvel, ha pled gans dha gentrevek.

4Na ro kosk dhe'th tewlagas,

na hun dhe greghyn dha dhewlagas;

5omwith avel ewik rag an helghor,

avel edhen rag dorn an edhnor.

6Ke dhe'n voryonenn, ty dhiek;

preder a'y fordhow hi, ha bydh fur.

7Heb ledyer,

naneyl soedhek na rewler,

8hi a bareus hy boes yn hav,

ha kuntell hy sosten y'n drevas.

9Pes termyn y hwrowedhydh, A dhiek?

P'eur hwre'ta sevel a'th hun?

10Nebes kosk, nebes hun,

nebes plegya a'n dhiwla dhe bowes,

11ha boghosogneth a dheu warnas avel brybour,

hag esow avel gour ervys.

12Den koeg, drog wour

a a-dro gans kows kamm,

13hag a wynk gans y dhewlagas, a grav gans y dhewdroes,

a gevarwoedh gans y vys;

14gans kolonn dreus ev a dhevis droktra,

pup-prys ow hasa kedrynnow.

15Ytho y derroes a dheu warnodho distowgh,

a-ji dhe brysweyth ev a vydh brewys dres sawya.

16Yma hwegh tra a gas an Arloedh,

seyth yw tra gasadow dhodho:

17lagasow goethus, taves gowek,

diwla hag a skoell goes gwiryon,

18kolonn hag a dewl droktowlow,

treys hag a fysk ow poenya dhe dhroktra,

19fals dhustunier hag a anell gow yn-mes,

ha den neb a has diskord yntra breder.

20Ow mab, gwith gorhemmynn dha das,

ha na forsak dyskans dha vamm.

21Kolm i war dha golonn pup-prys;

mayl i yn kyrghynn dha gonna.

22Pan gerdhydh, i a'th led;

pan wrowedhydh i a woel warnas;

ha pan dhifunydh i a gews genes.

23Rag an gorhemmynn yw lugarn ha'n dyskans yw golow,

ha'n reprevow a dhyskybleth yw an fordh a vewnans,

24rag dha witha orth benyn dhrog,

orth taves medhel an venyn estren.

25Na yeun war-lergh hy thekter y'th kolonn,

ha na as hi dhe'th synsi gans blewennow hy dewlagas;

26rag y hyllir gobrena hora a dorth-vara,

mes gwreg gour arall a breydh poran an enev drudh.

27A yll gour doen tan yn y askra,

ha'y dhillas bos heb aga leski?

28Po a yllir kerdhes war regydh

ha ny vydh y dhewdroes goleskys?

29Yndella yth yw neb a a-ji dhe wreg y gentrevek;

neb a's toch, ny vydh ev heb kessydhyans.

30Ny wra tus dispresya lader mar lader

rag lenwel y edhomm pan y'n jeves nown;

31mes mars yw dalghennys, ev a dal seythplek;

res yw dhodho ri oll gwara y ji.

32Neb a wra avoutri gans benyn yw diboell;

neb a'n gwra a omdhistru.

33Ev a'n jevydh goliow ha disenor,

ha ny vydh y vewl defendys.

34Rag avi a wra dhe wour bos konneryek,

ha ny vynn sparya pan gemmer dial.

35Ny vynn ev degemmeres attal vyth;

na ny vydh ev pes da, kyn redh rohow pals.