Gwarnyans erbynn Avoutres

1Ow mab, gwith ow geryow

ha tresor ow gorhemmynnow genes;

2gwith ow gorhemmynnow ha bewa,

gwith ow dyskas avel bew dha lagas;

3kolm i war dha vysies,

skrif i war legh dha golonn.

4Lavar dhe furneth, ‘Ty yw ow hwoer’,

ha hanw konvedhes dha gar-ogas;

5rag ma'th wittho dhiworth an venyn lows,

dhiworth an venyn estren gans hy geryow smodh.

6Rag orth fenester ow chi

my a viras war-ves der ow lattis,

7ha my a welas ynter an re sempel,

hag aspia ynter an wer yowynk

gour yowynk diboell,

8ow tremena der an stret yn ogas dh'y hornell,

owth holya an fordh dh'y chi,

9yn tewlwolow, y'n gorthugher,

yn termyn an nos, hag y'n tewlder.

10Hag otta, benyn a'n met,

gwiskys avel hora, fel hy holonn.

11Trosek yw, ha gorth,

ny worta hy threys tre;

12lemmyn y'n stret, lemmyn y'n varghas,

hag orth pub kornell hi a gontrewayt.

13Hi a'n ses hag a amm dhodho,

ha gans min tont hi a lever dhodho:

14‘Yma genev an kig gesys dhiworth sakrifisow ow offrynn kres;7:14 ow offrynn kres: Hi a wrug an offrynn ambos nammnygen; ytho an kig a veu pur fresk. Gwel Levitikus chapters 3 ha 7 rag rewlys an sakrifis ma.

hag y'n jydh hedhyw re dylis ow ambosow;

15ytho re dheuvev yn-mes rag metya orthis,

rag dha hwilas yn fen, ha my re'th kavas.

16My re afinas ow growedhva gans pallennow,

kolghesow liwek a sendal Ejyptek;

17My re velyshas ow gweli gans myrr,

aloes ha kinnamon.

18Deus, bedhen medhwys a gerensa bys y'n myttin,

gwren ni tastya war-barth an plesours a gerensa.

19Rag nyns usi ow gour tre,

gyllys yw yn vyaj pell;

20ev a dhug yalgh a arghans ganso;

dhe'n loer leun ev a dheu tre.’

21Gans lavarow ardhynus hi a'n denn;

gans hy diwweus smodh hi a'n dyn.

22Distowgh ev a's hol,

par dell a an ojyon dhe'n ladhva,

po dell yw karow synsys fast yn maglenn

23bys pan wra seth gwana y avi;

dell fysk edhen yn maglenn,

ha ny woer ev kost hemma dhe vos y vewnans.

24Ha lemmyn, A vebyon, goslowewgh orthiv,

ha bedhewgh hewoel dhe eryow ow ganow.

25Na as dha golonn dhe dreylya a-denewen dh'y fordhow,

na wander yn hy hynsyow;

26rag hi re fethas lies den goliys;

ha diniver yw oll an re a ladhas hi.

27Hy chi yw an fordh dhe ifarn,

ow tiyskynna dhe jambouryow ankow.