Galow Furneth

1A ny elow furneth,

a ny dhrehav konvedhes hy lev?

2War an tylleryow ughel ryb an fordh,

y'n hynsyow hi a sev;

3ryb an yetow a-rag an dre,

yn entrans an porthow hi a gri yn ughel:

4‘Dhywgh, A wer, yth esov ow kelwel,

hag ow kri yw dhe vebyon den.

5A hwi sempel, dyskewgh felder;

A dus foll, re'n konvettho agas kolon.8:5 re'n konvettho agas kolon: Po war-lergh an Septuagint gorrewgh e yn agas kolon.

6Klewewgh, rag y kowsav taklow gwiw,

ha dhiworth ow diwweus y teu taklow ewn;

7rag ow ganow a gews gwiryonedh;

droktra yw tra gasadow dhe'm diwweus.

8Oll geryow ow ganow yw gwiryon;

nyns eus travyth gwius na kamm ynna.

9I oll yw kompes dhe neb a gonvedh

hag ewn dhe'n re hag a gyv godhvos.

10Kemmer ow dyskans yn le arghans,

ha godhvos kyns owr dewisys;

11rag furneth yw gwell ages koral,

ha ny yll jowel vyth bos hevelebys dhedhi.

12‘My, furneth, a drig gans sotelneth,

hag y kavav godhvos ha doethter.

13Own an Arloedh yw kasa;

goeth ha balghder ha'n fordh a dhroktra

ha kows treus a gasav.

14My a'm beus kusul dha ha gwir alloes,

my a'm beus konvedhes ha nerth.

15Dredhov myghternedh a reyn,

ha rewloryon a orden an pyth yw ewn;

16dredhov pennternedh a rewl,

ha pennsevigyon, oll myns a wovern yn ewn.

17My a gar an re a'm kar,

ha'n re a'm hwila yn fen a'm kyv

18Yma rychys hag enor genev,

kevoeth ow pesya ha sewena.

19Ow froeth yw gwell ages owr, ages owr fin,

ha'm gwayn ages arghans dewisys.

20Yn fordh ewnder y kerdhav,

dre hynsyow a wirvreus,

21ow ri rychys dhe'n re a'm kar,

hag ow lenwel aga thresorvaow.

Rann Furneth y'n Kreasyon

22‘An Arloedh a'm formyas avel dalleth y ober,8:22 ober: Ebrow y hyns.

kyns y wreythresow a-henys.

23Kyns an oesow y feuv furvys,

y'n dalleth, kyns bosva an norvys.

24Pan nag esa downderyow y feuv genys yn gloesow,

pan nag esa fentynyow leun a dhowr.

25Kyns an menydhyow dhe vos settys yn aga le,

kyns an breow y feuv genys,

26kyns ev dhe wruthyl an norvys gans y welyow,

po an kynsa a weres an norvys.

27Pan settyas an nevow yn aga le, yth esen vy ena,

pan dhelinyas kylgh war enep an downvor,

28pan fastyas an ebron a-wartha,

pan ros nerth dhe fentynyow an downvor,

29pan ros y ordenans dhe'n mor,

rag na dremenna an dowrow y worhemmynn,

pan verkyas selyow an norvys,

30ena yth esen vy rybdho, avel mester-ser,

hag y fedhen vy y dhelit pub-dydhyek,

ow lowenhe a-ragdho pup-prys,

31ow lowenhe yn y norvys annedhys

ha'm delit a veu gans mebyon den.

32‘Ha lemmyn, a vebyon, goslowewgh orthiv,

gwynnvys an re hag a with ow fordhow.

33Klewewgh dyskans ha bedhewgh fur,

ha na wrewgh y nagha.

34Gwynnvys an den hag a woslow orthiv,

ow koelyas pub dydh war ow yet,

ow kwitha war bostow ow darasow.

35Rag neb a'm kyv a gyv bewnans

hag ev a'n jeves favour a'n Arloedh.

36Mes neb a fyll ow havoes a shynd y enev y honan,

kemmys a'm kas a gar ankow.’