Gwledh Furneth

1Furneth re dhrehevis hy chi,

hi re nadhas9:1 hi re nadhas: Po war-lergh an Septuagint hi re settyas yn-bann. hy seyth koloven.

2Hi re ladhas hy bestes, hi re vyskas hy gwin,

hi re bareusis hy moes.

3Hi re dhannvonas hy maghtethyon rag gelwel

dhiworth an ughella tylleryow y'n dre:

4‘Neb yw sempel treylys omma!’

Dhe neb na'n jeves skians hi a lever,

5‘Dewgh, dybrewgh a'm bara

hag evewgh a'n gwin re vyskis.

6Gesewgh sempledh ha bewewgh,

ha kerdhewgh y'n fordh a gonvedhes.’

7Neb a reprev skornyer a'n jeves despit,

ha neb a geredh drogoberer a berth pystik.

8Na geredh skornyer poken ev a'th kas;

keredh den fur hag ev a'th kar.

9Ro dyskans dhe dhen fur hag ev a vydh furra hwath,

dysk den gwiryon hag ev a ynkress yn dyskas.

10Own an Arloedh yw an dalleth a furneth,

ha godhvos an Sans yw konvedhes.

11Rag genev vy dha dhydhyow a vydh lieshes,

ha blydhynyow dha vewnans a vydh ynkressys.

12Mars osta fur, yth yw rag dha les dha honan,

mes mar skornydh, ty dha honan a'n perth.

Galow hag Ambos Follneth

13An venyn Follneth yw trosek,

dibreder yw ha ny woer travyth.

14Hi a esedh orth daras hy chi,

yn esedhva war dylleryow ughella an dre,

15ow kelwel dhe'n dremenysi

usi ow mones poran war aga fordh,

16‘Neb yw sempel treylys omma!’

Ha dhe neb na'n jeves skians hi a lever,

17‘Dowr re beu ledrys yw hweg,

hag yma blas da dhe vara dybrys yn-dann gel.’

18Mes ny woer ev spyrysyon an re varow dhe vos ena,

ha bos hy gwestoryon yn downderyow ifarn.