Salm a Davydh.

1Bennik an Arloedh, ow enev,

ha pup-tra eus ynnov,

bennik y hanow sans.

2Bennik an Arloedh, ow enev,

ha na ankov oll y dhader;

3Neb a av dhis oll dha gammweyth,

neb a yaghha oll dha glevesow,

4Neb a dhaspren dha vewnans dhiworth an pytt,

orth dha guruna gans tregeredh ha truedh,

5neb a'th lenow a dhader hedre vi bew

mayth yw nowydhhes dha yowynkneth kepar ha'n er.

6An Arloedh a wra ewnder

ha gwirvreus dhe seul yw arweskys.

7Ev a dherivas y fordhow dhe Moyses,

ha'y wriansow dhe vebyon Ysrael.

8An Arloedh yw truedhek ha grassyes,

lent ow serri ha meur y dregeredh.

9Ny vydh ev prest ow keredhi,

ha ny syns ev y sorr bynitha.

10Ny wrug ev dhyn war-lergh agan peghosow,

nag attyli dhyn war-lergh agan kammweythresow;

11rag mar ughel dell usi an ebron a-ugh an nor,

mar vras yw y dregeredh orth an re a berth own anodho;

12mar bell dell usi an howldrevel dhiworth an howlsedhes,

mar bell re worras ev agan kammwriansow dhiworthyn ni.

13Avel tas a gemmer truedh a'y fleghes,

yndellma an Arloedh a gemmer truedh a'n re a berth own anodho.

14Rag ev a aswonn agan devnydh;

yma kov dhodho agan bos doust.

15Dydhyow mab-den yw avel gwels;

avel bleujenn an gwel, yndella y fleujyow ev;

16an gwyns a dremen dresti, ha gyllys yw,

ha ny aswonnir hy tyller byth moy.

17Mes tregeredh an Arloedh re beu bythkweth hag a vydh bys vykken

war an re a berth own anodho,

ha'y ewnder dhe fleghes aga fleghes;

18dhe seul a syns y gevambos

hag a berth kov a'y arghadowyow, orth aga hollenwel.

19An Arloedh re fastyas y se y'n nevow,

ha'y wlaskor a wra maystri war bup-tra.

20Bennigewgh an Arloedh, hwi eledh ev,

hwi alloesogyon a wra herwydh y er ev,

seul a woslow orth y lev pan gews ev.

21Bennigewgh an Arloedh, oll y luyow,

y venystrys neb a wra y vodh.

22Bennigewgh an Arloedh, oll y oberow,

yn pub tyller a'y vaystri.

Ow enev, bennik an Arloedh.