1Bennik an Arloedh, ow enev.

A Arloedh ow Duw, pur veur osta.

Gwiskys osta yn enor ha splannder,

2ty a omwisk yn golow kepar hag yn kweth,

ha ty a dhisplet an nevow avel kroglenn;

3neb a worr kebrow y jambouryow y'n dowrow,

hag a wra an kommol y jarett,

hag a gerdh war eskelli an gwyns;

4Ev a wra y eledh spyrysyon,

ha'y venystrys tan ow flammya.

5Ev a fondyas selyow an nor,

ma na vens i disevys bynitha.

6Ty a'n kwethas gans an downvor kepar ha gans gwisk;

an dowrow a sevis a-ugh an menydhyow.

7Orth dha geredh i a fias dhe'n fo;

orth lev dha daran i a fyskas dhe-ves.

8I a yskynnas dhe'n menydhyow, i a dhiyskynnas dhe'n nansow

dhe'n tyller a dharbarsys dhedha.

9Ty re worras or na yllons treusi,

na treylya arta dhe gudha an nor.

10Ev a dhyllo fentynyow y'n nansow;

resek a wrons yn mysk an menydhyow;

11i a re dowr dhe bub best a'n gwel;

an asenes gwyls a derr aga syghes.

12Rybdha y trig ydhyn an nevow,

ha kana yn mysk an skorrennow.

13Ev a dhowrha an menydhyow dhiworth y jambouryow;

an nor yw lenwys a frut dha oberow.

14Ev a wra dhe'n gwels tevi rag an gwarthek,

ha losow rag gonisogeth den,

may tokko boes yn-mes a'n nor,

15ha gwin a heudhha kolonn den,

hag olew dhe wul dh'y fas dewynnya,

ha bara a grevha kolonn den.

16Gwydh an Arloedh yw leun a sugen,

kederwydh Lebanon a blansas ev;

17may hwra an ydhyn aga neythow ynna;

an meryw yw chi an hwibon.

18An menydhyow ughel yw dhe'n gever gwyls;

ha'n meynegi yw skovva rag an konines.

19Ev a ordenas an loer rag prysyow settys,

ha'n howl a aswonn termyn y sedhes.

20Ty a wra tewlder, ha hi a vydh nos,

may slynk a-derdro oll bestes an koes.

21An lewyon yowynk a us war-lergh aga freydh,

hag a hwila aga boes dhiworth Duw.

22Pan dhrehav an howl, i a omguntell war-barth

ha growedha yn aga fowys.

23Den a yn-mes dh'y ober

ha dh'y lavur bys y'n gorthugher.

24A Arloedh, ass yw lies dha wriansow!

Yn furneth ty a's gwrug, i oll;

an nor yw leun a'th kreaturs.

25Ottena an keynvor meur hag efan,

may ma kreaturs ow slynkya diniver,

taklow bew byghan ha bras.

26Ena yth a an gorholyon,

hag ena yma Lawethan a formsys dhe wari ynno.

27Oll an re ma a'th worta

may rylli dhedha aga boes y'n prys gwiw;

28ty a'n re dhedha hag i a'n kuntell;

ty a iger dha leuv, ha lenwys yns i a dhader.

29Pan gudhydh dha fas, dyegrys yns i;

pan gemmerydh aga anall i a verow,

ha treylya arta dh'aga doust.

30Ty a dhyllo dha anall ha formys yns i,

ha ty a nowydhha enep an nor.

31Golewder an Arloedh a dhur bys vykken;

an Arloedh a lowenha yn y wriansow.

32Ev a vir orth an nor ha'n nor a gren,

ev a doch an menydhyow hag i a veg.

33My a gan dhe'n Arloedh hedre vewiv;

my a wormel ow Duw ha my hwath yn few.

34Bedhes ow freder plegadow dhodho,

my a lowenha y'n Arloedh.

35Gas peghadoryon dhe vos kisys yn-mes a'n nor,

ha na as an debeles dhe besya namoy.

Bennik an Arloedh, ow enev.

Gormelewgh an Arloedh.