1Grassewgh dhe'n Arloedh, gelwewgh war y hanow,

derivewgh y wriansow yn mysk an poblow.

2Kenewgh dhodho, kenewgh gormola dhodho;

kewsewgh a'y varthusyon oll.

3Bostyewgh yn y hanow sans;

lowenhes kolonn an re a hwila an Arloedh.

4Hwilewgh an Arloedh ha'y nerth;

hwilewgh y fas pup-prys.

5Perthewgh kov a'y varthusyon re wrug,

y anethow, ha breusow y anow,

6A has Abraham y was,

hwi vebyon Yakob a dhewisas.

7Ev yw an Arloedh agan Duw;

yma y vreusow yn oll an nor.

8Ev a borthas kov a'y gevambos bynitha,

an ger a worhemmynnis dhe vil henedh;

9an kevambos a wrug gans Abraham,

ha'n ti a dos dhe Ysak;

10ev a'n ros dhe Yakob avel ordenans,

ha dhe Ysrael avel kevambos bys vykken,

11ow leverel, ‘Dhiso jy y rov pow Kanan

avel kevrenn dha ertach.’

12Pan ens i hwath boghes aga niver,

pur voghes, hag alyons y'n tir,

13ha pan ethons a unn genedhel dhe genedhel arall,

a unn wlaskor dhe bobel arall,

14ny asas ev denvyth dhe wul kamm dhedha;

yn tevri ev a geredhis myghternedh ragdha:

15‘Na dochyewgh an re untys genev,

ha na bystigewgh ow frofoesi.’

16Hag ev a elwis esow war an tir,

ha terri pub lorgh a vara.

17Ev a dhellos gour a-dheragdha,

Yosep, neb a veu gwerthys yn kethwas;

18Y dreys a bystigsons yn kargharow,

y enev eth yn horn.

19Bys y'n prys may teuth y er,

lavar an Arloedh a'n provas.

20An myghtern a dhannvonas ha'y dhigelmi;

rewler an poblow a'n delivras dhe wari.

21Ev a'n gwrug arloedh y ji,

ha rewler war oll y byth ev,

22dhe gelmi y bennsevigyon herwydh y vodh,

ha dhe dhyski furneth dh'y henavogyon.

23Ena Ysrael a dheuth yn Ejyp,

ha Yakob a drigas avel alyon yn pow Ham.

24Hag ev a ynkressyas y bobel yn feur;

ha'ga gul kreffa es aga eskerens.

25Ev a dreylyas aga holonn may kassens y bobel,

ha dyghtya y wesyon yn fals.

26Ev a dhannvonas Moyses y was,

hag Aron neb re dhewissa ev.

27I a dhiskwedhas y doknys yn aga mysk,

ha marthusyon yn pow Ham.

28Ev a dhannvonas tewlder hag y tewlhas;

hag i a settyas hwath erbynn y eryow.105:28 hag i a settyas hwath erbynn y eryow: Amendys; Ebrow ha ny rebellsons erbynn y eryow.

29Ev a dreylyas aga dowrow yn goes,

hag a ladhas aga fuskes.

30Aga thir a dhros yn-mes hesow a gwilkynyow,

hwath yn chambouryow aga myghternedh.

31Ev a gewsis, hag y teuth hesow a gelyon,

ha gwibes yn oll aga oryon.

32Ev a ros dhedha keser rag glaw,

ha tan ow flammya yn aga thir.

33Hag ev a weskis aga gwinbrennyer ha'ga figbrennyer,

ha terri an gwydh esa yn aga oryon.

34Ev a gewsis, hag y teuth hesow a lokustes,

ha lokustes diaskell diniver;

35hag i a dhybris oll an losow yn aga thir,

ha lenki frut aga dor.

36Hag ev a weskis pub kynsa-genys yn aga thir,

an flour a oll aga nerth.

37Hag ev a's hembronkas yn-mes gans owr hag arghans,

ha ny drebuchyas denvyth yn aga loethow.

38Ejyp a lowenhas pan ethons dhe-ves,

rag own anedha a goedhsa warnedha.

39Ev a lesas kommolenn yn kudhans,

ha tan dhe ri golow nosweyth.

40I a wovynnas, hag ev a dhros rynki,

hag a's lenwis a vara nev.

41Ev a igoras an garrek, ha'n dowrow a dhewragas;

avonyow a resas y'n syghtiryow.

42Rag ev a borthas kov a'y ambos sans,

hag a Abraham y was.

43Hag ev a dhros y bobel yn-mes gans lowena,

an re dhewisys gans garmow a lowender.

44Hag ev a ros dhedha tiryow an kenedhlow,

hag i a eritas lavur an poblow,

45rag may synsens y ordenansow

ha gwitha y laghys.

Gormelewgh an Arloedh.