1Gormelewgh an Arloedh.

Grassewgh dhe'n Arloedh, rag ev yw da,

rag y dregeredh a dhur bys vykken.

2Piw a yll kewsel a wriansow nerthek an Arloedh

po diskwedhes oll y wormola?

3Gwynnvys an re a syns gwirvreus,

hag a wra ewnder pup-prys.

4Porth kov ahanav, A Arloedh, herwydh dha ras orth dha bobel;

deus dhymm gans dha selwyans;

5rag may hwelliv sewenyans an re dewisys genes,

ha lowenhe yn heudhder dha genedhel,

ha bostya gans dha ertach.

6Ni re beghas gans agan tasow;

ni re wrug kammweythres ha sherewneth.

7Agan tasow yn Ejyp

ny gonvedhsons dha varthusyon,

na perthi kov a'th tregeredh veur,

mes i a rebellyas ryb an mor, ryb an Mor Rudh.

8Byttegyns ev a's selwis a-barth y hanow,

rag may hwrella dh'y wriansow nerthek bos aswonnys.

9Hag ev a geredhis an Mor Rudh, ha desyghys veu;

ytho ev a's hembronkas der an downderyow kepar ha der an difeyth.

10Hag ev a's selwis a leuv an re a's kasas,

ha'ga dasprena dhiworth leuv an eskar.

11An dowrow eth dres aga eskerens;

nyns o nagonan anedha gesys.

12Ena i a gryssons dh'y eryow ev;

i a ganas y wormola.

13Hware yth ankovsons y wriansow;

ny wortsons y gusul.

14Mes drokhwans krev a dheuth warnedha y'n difeyth;

hag i a brovas Duw y'n gwylvos.

15Hag ev a wrontyas dhedha aga govynnadow,

mes dannvon kleves fell yn aga enev.

16Hag i a borthas avi orth Moyses yn mysk an tyldow,

hag orth Aron, sans an Arloedh.

17An dor a igoras ha kollenki Dathan,

ha kudha kuntelles Abiram.

18Ha tan a dardhas yn aga huntelles;

an flamm a loskas an debeles.

19I a wrug leugh yn Horeb

ha gordhya an imaj teudh.

20Ytho i a dreylyas aga gordhyans

dhe hevelep ojyon ow tybri gwels.

21I a ankovas Duw aga Selwyas,

neb re wrug gwriansow meur yn Ejyp,

22gwriansow marthys yn pow Ham,

ha gwriansow euthyk ryb an Mor Rudh.

23Rakhenna ev a leveris y hwrussa aga diswul,

na saffa Moyses y dhewisys

a-dheragdho y'n aswa,

rag treylya y sorr dhe-ves ma na's diswrello.

24Ena i a skornyas an tir teg,

ha ny gryssons dh'y er ev;

25mes i a grodhvolas yn aga thyldow;

ny woslowsons orth lev an Arloedh.

26Ytho ev a dhrehevis y leuv er aga fynn

dh'aga domhwel y'n difeyth,

27dhe wul dh'aga has koedha yn mysk an kenedhlow,

ha dh'aga skattra y'n broyow.

28Hag i a lenas orth Baal-peor,

ha dybri offrynnow an re varow.

29Yndella i a'n sorras der aga gwriansow,

ha'n pla a dardhas yn aga mysk.

30Ena Finehas a sevis ha breusi,

ha'n pla a hedhis.

31Hag y feu henna reknys dhodho avel ewnder

a unn henedh dhe'n nessa bys vykken ha bynnari.

32I a'n sorras ynwedh ryb dowrow Meriba,

may porthas Moyses dregynn a-barth dhedha;

33Rag i a rebellyas erbynn y spyrys,

may kewsis yn tibreder gans y dhiwweus.

34Ny dhiswrussons an kenedhlow

kepar dell worhemmynnis an Arloedh dhedha;

35Mes i a veu kemmyskys gans an kenedhlow

ha dyski aga gwriansow.

36Hag i a servyas aga fals dhuwow,

o antell dhedha.

37I a offrynnas aga mebyon

ha'ga myrgh dhe'n dywolow;

38ha skoellya goes gwiryon,

goes aga mebyon ha'ga myrgh,

neb a offrynnsons dhe dhuwow Kanan;

ha'n tir a veu defolys gans goes.

39Yndella i a veu mostys yn aga gwriansow aga honan,

hag i a omdhug avel horys yn aga gwriansow.

40Rakhenna sorr an Arloedh a dhewis erbynn y bobel,

hag ev a aborryas y ertach y honan.

41Hag ev a's ros yn leuv an kenedhlow,

ha'n re a's kasas a wrug maystri warnedha.

42Ha'ga eskerens a's gwaskas,

hag i a veu fethys yn-dann aga diwleuv.

43Lieskweyth ev a's delivras,

mes i a rebellyas erbynn y gusul,

hag a veu dres isel yn aga hammweyth.

44Byttegyns ev a welas aga anken

pan woslowas ev orth aga garm.

45Hag ev a borthas kov a'y gevambos a'ga govis i,

hag edrek a'n jeva herwydh y dregeredh meur;

46hag ev a wrug dhedha kavoes truedh

dhiworth oll an re a's kemmeras yn kethneth.

47Salw ni, A Arloedh agan Duw,

ha kuntell ni yn-mes a'n kenedhlow,

may hwodhven gras dhe'th hanow sans

ha bostya y'th wormola.

48Benniges re bo an Arloedh, Duw Ysrael,

trank heb worfenn ha bys vykken ha bynnari.

Ha leveres oll an bobel, ‘Amen.’

Gormelewgh an Arloedh.