LYVER V

1Grassewgh dhe'n Arloedh, rag ev yw da;

rag y dregeredh a dhur bys vykken.

2Leveres yn kettellma an re dasprenys gans an Arloedh,

a wrug ev dhe dhasprena dhiworth dorn an eskar,

3ha'n re a guntellas ev mes a'n powyow,

dhiworth an howldrevel ha dhiworth an howlsedhes,

dhiworth an kledh ha dhiworth an dyghow.

4I a wandras y'n difeyth hag yn fordh an gwylvos,

ny gavsons sita may trykkens ynni;

5nown a's teva ha syghes,

aga enev a glamderas ynna.

6Ena i a elwis war an Arloedh yn aga foenvos,

hag ev a's delivras dhiworth aga ankres.

7Hag ev a's hembronkas war an fordh ewn,

mayth ellens dhe sita dhe driga ynni.

8A krassens i dhe'n Arloedh y dregeredh,

ha'y varthusyon rag mebyon den!

9Rag ev a re lowr dhe'n enev syghesik,

hag ev a lenow a dhader an enev nownek.

10Seul a esedh yn tewolgow hag yn skeus ankow,

kelmys yn anken107:10 anken: Po kethneth. ha horn,

11drefenn i dhe omsettya erbynn lavarow Duw,

ha dispresya kusul an Ughella;

12Ev a iselhas aga holonn gans lavur;

i a drebuchyas, ha nyns esa denvyth a's gweressa.

13Ena i a elwis war an Arloedh yn aga foenvos,

hag ev a's delivras dhiworth aga ankres.

14Ev a's dros yn-mes a dewolgow ha skeus ankow,

hag a dorras aga holmow dhe demmyn.

15A krassens i dhe'n Arloedh y dregeredh,

ha'y varthusyon rag mebyon den!

16Rag ev re dorras an porthow a vrons,

ha treghi an barrys a horn.

17Re anedha o klav drefenn aga threuspass,

ha drefenn aga hammweyth yth ens i pystigys.

18Aga enev a aborryas boes a bub eghenn,

hag i a dheuth nes dhe borthow ankow.

19Ena i a elwis war an Arloedh yn aga foenvos,

hag ev a's delivras dhiworth aga ankres.

20Ev a dhannvonas y er ha'ga sawya,

ha'ga delivra dhiworth terroes.

21A krassens i dhe'n Arloedh y dregeredh,

ha'y varthusyon rag mebyon den!

22Ha gwrens i offrynna offrynnow grasyans,

ha derivas y wriansow gans kanow lowena.

23Kemmys a yn-nans dhe'n mor yn gorholyon,

ow kul negys yn dowrow meur;

24an re ma re welas gwriansow an Arloedh,

ha'y varthusyon y'n downder.

25Ev a gewsis, ha drehevel an hager-awel,

hag a sevis tonnow an mor.

26I a yskynnas dhe'n nevow, ha diyskynna dhe'n downderyow;

aga enev a deudhis drefenn poenvotter;

27i a droyllyas ha trebuchya kepar ha den medhow,

hag oll aga skians a fyllis.

28Ena i a elwis war an Arloedh yn aga foenvos,

hag ev a's delivras dhiworth aga ankres.

29Ev a wrug an hager-awel kalmynsi,

may tewis tonnow an mor.

30Ena yth ens i heudhik rag aga bos kosel,

hag ev a's hembronkas bys y'n porth may fynnsons bos.

31A krassens i dhe'n Arloedh y dregeredh,

ha'y varthusyon rag mebyon den!

32Ha gwrens i y ughelhe yn kuntelles an bobel,

ha'y wormel yn kuntellva an henavogyon.

33Ev a wra dhe avonyow bos difeyth,

ha dhe fentynyow dowr bos tir sygh.

34Ev a wra dhe dir leun a frut bos difeythtir,

drefenn sherewneth an re usi trigys ynno.

35Ev a dreyl an difeyth dhe boll a dhowr,

ha tir sygh dhe fentynyow dowr.

36Hag ena y hwra ev dhe'n re nownek triga,

may tarbarrons sita dhe driga ynni;

37ha gonis has yn parkow, ha plansa gwinlannow,

hag a re frut ha trevas.

38Hag ev a's bennik, mayth ynkressyons yn fras,

ha ny as aga gwarthek dhe lehe.

39Mes pan yns i lehes ha plegys dhe'n dor

dre arwask, anken ha galar,

40ev a dhinwa despit war bennsevigyon

ha gul dhedha gwandra yn difeyth hepfordh;

41mes ev a dhrehav an boghosek mes a anken,

hag a wra teyluyow ragdho avel flokk.

42An re ewnhynsek a wel henna, ha lowenhe;

ha pub sherewneth a dhege y anow.

43Piwpynag a vo fur, avisyes a'n taklow ma,

ha prederens i a dregeredh an Arloedh.