1Pan eth Ysrael mes a Ejyp,

chi Yakob a-dhiworth pobel astranj aga yeth,

2Yuda o y sentri,

hag Ysrael y vestrynsys.

3An mor a welas henna, ha fia;

an Yordan a dreylyas war-dhelergh.

4An menydhyow a derlemmis kepar ha hordhes,

ha'n brennow kepar ha deves yowynk.

5Pandr'a hwer dhis, A vor, ty dhe fia,

ty, Yordan, dhe dreylya war-dhelergh?

6Hwi venydhyow, dhe derlemmel kepar ha hordhes;

hwi vrennow, kepar ha deves yowynk?

7Kren, A dhor, a-dherag an Arloedh,

a-dherag Duw Yakob,

8neb a dreylyas an garrek dhe boll a dhowr,

an men flynt dhe fenten dowr.