1Na ro dhyn ni, A Arloedh, na ro dhyn ni an gordhyans, mes dhe'th hanow jy,

a-barth dha dregeredh ha'th wiryonedh.

2Prag y lever an kenedhlow

‘Ple'ma aga Duw?’

3Mes agan Duw, yma ev y'n nevow;

ev re wrug kekemmys a vynnas.

4Aga imajys yw arghans hag owr,

ober diwleuv den.

5Ganow a's teves, mes ny gewsons;

dewlagas a's teves, mes ny welons.

6Diwskovarn a's teves, mes ny glewons;

dewfrik a's teves, mes ny vlasons.

7Diwleuv a's teves, mes ny davons;

treys a's teves mes ny gerdhons;

ny gewsons der aga bryansenn

8An re a's gwra yw kehaval dhedha;

hag ynwedh oll an re a drest ynna.

9A Ysrael, trest y'n Arloedh;

ev yw aga gweres ha'ga skoes.

10A ji Aron, trest y'n Arloedh;

ev yw aga gweres ha'ga skoes.

11Hwi neb a berth own a'n Arloedh, trestyewgh y'n Arloedh;

ev yw aga gweres ha'ga skoes.

12An Arloedh re borthas kov ahanan, hag ev a'gan bennik;

ev a vennik chi Ysrael,

ev a vennik chi Aron.

13Ev a vennik an re a berth own a'n Arloedh,

kekeffrys byghan ha bras.

14An Arloedh a'gas moghha moy ha moy,

hwi ha'gas fleghes.

15An re bennigys gans an Arloedh owgh hwi,

formyer nev ha nor.

16An nevow yw nevow an Arloedh,

mes an nor re ros ev dhe vebyon den.

17Ny wormel an re varow an Arloedh,

naneyl oll an re a dhiyskynn dhe daw.

18Mes ni a vennik an Arloedh

alemma rag ha bys vykken.

Gormelewgh an Arloedh.