1My a gar an Arloedh, rag ev re glewas

lev ow govynnadow.

2Drefenn ev dhe blegya y skovarn dhymm,

rakhenna my a elow warnodho hedre vewiv.

3Kerdyn ankow res eth a-dro dhymm;

ha galarow ifarn a'm dalghennas;

My a gavas anken hag ahwer.

4Ena my a elwis war hanow an Arloedh:

‘A Arloedh, my a'th pys, delirv ow enev.’

5Grassyes yw an Arloedh, ha gwiryon;

devri truedhek yw agan Duw.

6An Arloedh a with an re sempel;

my a veu dres dhe iselder, hag ev a'm selwis.

7Dehwel dhe'th powesva, ow enev,

rag an Arloedh re beu da orthis.

8Rag ty re dhelivras ow enev dhiworth ankow,

ow dewlagas dhiworth dagrow,

ha'm treys dhiworth koedha.

9My a gerdh a-dherag an Arloedh

yn tir an re vew.

10My a grysis, hwath pan leveris

‘Iselhes en vy yn feur.’

11My a leveris yn ow fysk,

‘Tus oll yw gowleverysi.’

12Py gober a rov dhe'n Arloedh

rag oll y helder dhymm?

13My a dhrehav an hanaf a selwyans

ha gelwel war hanow an Arloedh.

14My a dal ow ambosow dhe'n Arloedh lemmyn

a-dherag oll y bobel.

15Drudh yn golok an Arloedh

yw mernans y syns.

16Yn hwir, A Arloedh, dha was ov vy,

dha was ov vy, ha mab dha vaghteth.

Ty re dorras ow holmennow.

17My a offrynn dhis sakrifis a rasyans

ha gelwel war hanow an Arloedh.

18My a dal ow ambosow dhe'n Arloedh

lemmyn a-dherag oll y bobel,

19yn klosyow chi an Arloedh,

a-bervedh ynnos, A Yerusalem.

Gormelewgh an Arloedh.