1Grassewgh dhe'n Arloedh, rag da yw;

rag y dregeredh a dhur bys vykken.

2Leveres Ysrael lemmyn,

bos y dregeredh ow turya bys vykken.

3Leveres chi Aron lemmyn,

bos y dregeredh ow turya bys vykken.

4Leveres lemmyn an re a berth own a'n Arloedh,

bos y dregeredh ow turya bys vykken.

5Yn ahwer y helwis vy war an Arloedh;

ev a worthybis dhymm, ha'm gorra yn tyller ledan.

6Yma an Arloedh a-barth dhymm; ny borthav own.

Pandr'a yll den dhe wul dhymm?

7Yma an Arloedh a-barth dhymm gans ow gweresoryon;

rakhenna y hwelav ow mynnas war an re a'm kas.

8Gwell yw hwilas skovva y'n Arloedh

ages gorra fydhyans yn mab-den.

9Gwell yw hwilas skovva y'n Arloedh

ages gorra fydhyans yn pennsevigyon.

10An kenedhlow oll a hesyas a-dro dhymm;

mes yn hanow an Arloedh my a wra aga distrui.

11I a hesyas a-dro dhymm, devri yth omsettsons a-dro dhymm;

mes yn hanow an Arloedh my a wra aga distrui

12I a hesyas a-dro dhymm avel gwenen;

i a dhewis118:12 dhewis: Amendys war-lergh an Septuagint. Ebrow difeudhys yns. avel tan a dhreyn;

rag yn hanow an Arloedh my a wra aga distrui.

13Ty re'm herdhyas yn feur rag may koetthiv,

mes an Arloedh a'm gweresas.

14An Arloedh yw ow nerth ha'm kan,

hag ev re dheuth ha bos selwyans dhymm.

15Yma lev lowender ha selwyans yn tyldow an re wiryon;

leuv dhyghow an Arloedh a wra taklow galloesek.

16Leuv dhyghow an Arloedh yw ughelhes;

leuv dhyghow an Arloedh a wra taklow galloesek.

17Ny vydhav marow, mes bew,

ha derivas gwriansow an Arloedh.

18An Arloedh re'm kessydhyas yn tynn,

mes ny'm ros dhe'n mernans.

19Igor dhymm an porthow a ewnder,

yth av a-ji dhedha

ha grassa dhe'n Arloedh.

20Hemm yw porth an Arloedh;

yth a an re wiryon a-ji dhodho.

21My a ras dhis, rag ty re worthybis dhymm

ha ty re dheuth ha bos ow selwyans.

22An men a skonyas an weythoryon

re dheuth ha bos pennmen an korn.

23Hemm yw gwrians an Arloedh;

marthys yw yn agan dewlagas.

24Hemm yw an jydh re wrug an Arloedh;

ni a lowenha ha bos heudhik ynno.

25Gwra selwel lemmyn, ni a'th pys, A Arloedh.

A Arloedh, ni a'th pys, dannvon lemmyn sewenyans.

26Benniges yw neb a dheu yn hanow an Arloedh.

Ni re'gas bennigas dhiworth chi an Arloedh.

27Duw yw an Arloedh,

neb re ros golow dhyn.

Pareusewgh an solempnita gans skorrennow,118:27 Pareusewgh an solempnita gans skorrennow: Po Kelmewgh an sakrifis gans kerdyn.

hag yskynnewgh dhe gern an alter.

28Ty yw ow Duw, ha my a ras dhis;

ty yw ow Duw ha my a'th ughelha.

29Grassewgh dhe'n Arloedh, rag da yw,

rag y dregeredh a dhur bys vykken.