1Gwynnvys an re yw heb namm y'n fordh,

hag a gerdh yn lagha119:1 lagha: An eth ger-alhwedh y'n salm ma yw torah ‘lagha’, huqqim ‘ordenansow’, mishpatim ‘breusow’, piqqudim ‘arghadowyow’, miswoth ‘gorhemmynnow’, edoth ‘dustuniow’, dabar ‘ger’, imarah ‘lavar’. an Arloedh.

2Gwynnvys an re a with y dhustuniow,

hag a'n hwila ev a leun golonn;

3an re ynwedh na wra sherewneth,

neb a gerdh yn y fordhow ev.

4Ty re worhemmynnis

may synsyn dha arghadowyow gans rach.

5Unnweyth mar pe ow fordhow mar fast

may hwrellen vy synsi dha ordenansow!

6Ytho ny borthav meth,

pan wrama vri a'th worhemmynnow oll.

7My a ras dhis gans ewnder kolonn,

pan dhyskav dha vreusow gwiryon.

8My a syns dha ordenansow;

na wra ow gasa yn tien.

9Fatell wra den yowynk glanhe y hyns?

Owth omwitha herwydh dha er.

10A leun golonn my re'th hwilas;

na as vy dhe vos yn stray dhiworth dha worhemmynnow.

11Dha lavarow re gudhis y'm kolonn,

ma na begghiv er dha bynn.

12Ty yw benniges, A Arloedh;

dysk dhymm dha ordenansow.

13Gans ow diwweus re venegis vy

oll breusow dha anow.

14My re lowenhas yn fordhow dha dhustuniow

kemmys hag yn kevoeth pub oll.

15My a vynn prederi a'th arghadowyow,

ha hwithra dha hynsyow.

16My a lowenha y'th ordenansow;

ha ny wrav ankevi dha er.

17Bydh hel orth dha was,

rag may pewiv, ha synsi dha er.

18Igor ow dewlagas

may hwelliv marthusyon dha lagha.

19Alyon ov vy war an nor;

na gudh dha worhemmynnow ragov.

20Ow enev yw konsumys gans hireth

war-lergh dha vreusow pub dydh oll.

21Ty re geredhis an re woethus;

milliges yw an re a gammdremen dhiworth dha worhemmynnow.

22Treyl a-dhiworthiv mewl ha despit,

rag my re withas dha dhustuniow.

23Pennsevigyon ynwedh a esedhas ha kewsel er ow fynn,

mes dha was a brederis a'th ordenansow.

24Dha dhustuniow ynwedh yw ow lowena,

ow husulyoryon.

25Ow enev a len orth an doust;

bewha vy herwydh dha er.

26My a dherivas ow fordhow, ha ty a'm gorthybis;

dysk dhymm dha ordenansow.

27Gwra dhymm konvedhes fordh dha arghadowyow,

ha my a breder a'th varthusyon.

28Yma ow enev ow teudhi dre voredh;

krevha vy herwydh dha er.

29Kemmer dhiworthiv an fordh a falsuri,

ha gront dhymm ras dha lagha.

30My re dhewisas an fordh a lenduri,

ha'th vreusow re worris a-dheragov.

31My re lenas orth dha dhustuniow;

A Arloedh, na as vy dhe vos toellys.

32Poenya a wrav yn fordh dha worhemmynnow,

pan redh jy kennerth dhe'm kolonn.

33Dysk dhymm, A Arloedh, fordh dha ordenansow,

ha my a's gwith bys y'n diwedh.

34Gwra dhymm konvedhes, ha my a with dha lagha;

devri my a'n syns a leun golonn.

35Gwra dhymm mos yn hyns dha worhemmynnow,

rag ynno yma ow lowena.

36Pleg ow holonn troha'th tustuniow,

ha na wra hy flegya troha krefni.

37Treyl ow dewlagas dhe-ves, ma na wellons euveredh;

bewha vy y'th fordh.

38Kollanw dha lavar rag dha was,

neb a omre dhe own ahanas.

39Treyl dhe-ves an geredh a borthav own anedhi,

rag da yw dha vreusow.

40Otta, my re yeunis war-lergh dha arghadowyow;

bewha vy y'th ewnder.

41Re dheffo dhymm dha dregeredh, A Arloedh,

dha selwyans, herwydh dha lavar.

42Ena my a yll gorthybi dhe'n den a'm kabel,

rag my a drest yn dha er.

43Na gemmer an ger a wiryonedh yn-mes a'm ganow yn tien,

rag my re fydhyas y'th vreusow.

44My a syns dha lagha pup-prys,

bys vykken ha bynnari.

45Ha my a gerdh yn rydhses,

rag my a hwila dha arghadowyow.

46My a gews a'th tustuniow a-dherag myghternedh,

ha ny borthav meth.

47My a lowenha y'th worhemmynnow

a wrugavy aga hara.

48Ha my a dhrehav ow diwleuv dhe'th worhemmynnow a geris,

ha my a breder a'th ordenansow.

49Porth kov a'n ger orth dha was,

ynno may hwruss'ta dhymmo fydhya.

50Hemm yw ow honfort y'm anken,

rag dha lavar re'm bewhas.

51Tus woethus re'm skornyas dres eghenn,

byttegyns ny blegis vy dhiworth dha lagha.

52My a borthas kov a'th vreusow re beu a-dhia'n oesow koth,

ha konfort a gevis.

53Konnar a'm dalghennas drefenn an debeles,

an re a forsak dha lagha.

54Dha ordenansow re beu kanow dhymm

yn chi ow fergherinses.

55My re borthas kov a'th hanow yn nos, A Arloedh,

ha my re synsis dha lagha.

56Hemma re beu ow usadow,

rag my re withas dha arghadowyow.

57Ty yw ow rann, A Arloedh.

My a ambos synsi dha eryow.

58My re hwilas dha fas119:58 My re hwilas dha fas: Ebrow My re dhisorras dha fas. a leun golonn;

bydh grassyes orthiv herwydh dha lavar.

59My a brederis a'm fordhow

ha treylya ow threys troha'th tustuniow.

60My a fistenas ha ny dhelatis an termyn

rag synsi dha worhemmynnow.

61Lovonow an debeles re'm kolmas,

mes ny ankevis dha lagha.

62Yn hanter-nos sevel a wrav rag grassa dhis,

drefenn dha vreusow gwiryon.

63Koweth ov vy dhe seul a'th own

hag a syns dha arghadowyow.

64An nor, A Arloedh, yw leun a'th tregeredh;

dysk dhymm dha ordenansow.

65Ty re wrug da dhe'th was,

A Arloedh, herwydh dha er.

66Dysk dhymm skians da ha godhvos,

rag my re grysis y'th worhemmynnow.

67Kyns my dhe vos yn anken, my a gammdremenas,

mes lemmyn my a syns dha lavar.

68Da osta jy ha grassyes;

dysk dhymm dha ordenansow.

69An re woethus re'm droguras gans gowyow er ow fynn,

mes my a with dha arghadowyow a leun golonn.

70Maga tew avel an blonek yw aga holonn,

mes my a lowenha y'th lagha.

71Da yw ow bos yn anken,

rag may tyskiv dha ordenansow.

72Gwell genev yw lagha dha anow

ages milyow a owr hag a arghans.

73Dha dhiwleuv re'm gwrug ha'm formya;

gwra dhymm konvedhes, may tyskiv dha worhemmynnow.

74An re a'th own a'm gwel ha lowenhe,

rag my re fydhyas y'th ger.

75My a woer, A Arloedh, dha vreusow dhe vos gwiryon,

hag yn lenduri ty dhe'm trobla.

76Bedhes dha dregeredh orth ow hebaskhe,

herwydh dha ambos dhe'th was.

77Des dhymm dha druedh, may fiv vy bew;

rag dha lagha yw ow lowena.

78Perthes an re woethus meth, rag gans falsuri y hwrussons kamm dhymm;

mes my a breder a'th arghadowyow.

79Treylyes dhymmo vy an re a berth own ahanas,

ha'n re a aswonn dha dhustuniow.

80Bedhes ow holonn perfydh y'th ordenansow,

ma na berthiv meth.

81Difygya a wra ow enev ow yeuni war-lergh dha selwyans;

mes my a fydh yn dha er.

82Ow dewlagas a fyll ow yeuni war-lergh dha lavar,

ow leverel, ‘P'eur hwredh jy ow hebaskhe?’

83Rag desyghys ov vy avel botell yn mog;

ny ankevis dha ordenansow

84Py lies yw dydhyow dha was?

P'eur hwredh jy breus erbynn an re a wra ow helghya?

85An re woethus re gleudhyas pyttow ragov,

nag yns herwydh dha lagha.

86Oll dha worhemmynnow yw fyrv.

I a wra ow helghya gans falsuri; ty bydh gweres dhymmo vy.

87Nammna wrussens i ow hisya war an nor,

mes ny skonis dha arghadowyow.

88Bewha vy herwydh dha dregeredh;

yndellma y synsav dustuniow dha anow.

89Dha er, A Arloedh,

yw desedhys fast bynitha yn nev.

90Yma dha lelder a unn henedh dhe'n nessa;

ty re selyas an nor, hag ev a sev.

91Herwydh dha vreusow i a dhur hedhyw,

rag pup-tra oll yw dha servysi.

92Na ve dha lagha ow lowena,

devri my a vawrsa yn ow anken.

93Bynitha ny ankovav dha arghadowyow,

rag dredha ty re'm bewhas.

94Ty a'm piw, salw vy;

rag my re hwilas dha arghadowyow.

95An debeles re'm gortas rag ow hisya,

mes my a breder a'th tustuniow.

96My re welas bos finweth dhe bub perfydhder,

mes dha worhemmynn yw efan dres eghenn.

97Assa wrav vy kara dha lagha;

oll an jydh my a breder anodho!

98Dre dha worhemmynnow ty re'm gwrug furra ages ow eskerens,

rag ymons i genev bynitha.

99My a gonvedh moy ages ow dyskadoryon oll,

rag my a breder yn town a'th tustuniow.

100My a gonvedh moy ages an henavogyon,

drefenn my dhe witha dha arghadowyow.

101My re withas ow threys rag pub drog hyns,

rag may synsiv dha er.

102Ny blynchis vy dhiworth dha vreusow,

drefenn ty dhe dhyski dhymm.

103Ass yw hweg dha lavarow dhe'm stevnik,

hwekka es mel dhe'm ganow!

104Dre dha arghadowyow my a gyv skentoleth;

rakhenna my a gas pub drog hyns.

105Lugarn dhe'm treys yw dha er,

ha golow dhe'm hyns.

106My re dos hag afydhya,

my dhe synsi dha vreusow gwiryon.

107Troblys ov vy dres musur;

bewha vy, A Arloedh, herwydh dha er.

108Degemmer, A Arloedh, an offrynnow bolonjedhek a'm ganow,

ha dysk dhymm dha vreusow.

109Yma ow enev prest y'm leuv;

byttegyns ny ankovav dha lagha.

110An debeles re worras maglenn ragov,

mes nyns yth vy yn stray dhiworth dha arghadowyow.

111My re gemmeras dha dhustuniow yn ertach bys vykken,

rag lowena ow holonn yns i.

112My re worras ow holonn dhe wul dha ordenansow

bys vykken, ha bys y'n diwedh.

113My a gas an re yw dewblek aga brys,

mes dha lagha a garav.

114Ow hovva ha'm skoes osta jy;

yn dha er jy y fydhyav.

115Kewgh a-dhiworthiv, hwi dhrogoberoryon,

rag may hwitthiv gorhemmynnow ow Duw.

116Gwra ow mentena herwydh dha lavar, may fewiv,

ha na as vy dhe vos toellys y'm govenek

117Skoedh vy, may fiv saw,

ha prest y lowenhav y'th ordenansow.

118Ty a dhispres oll an re res eth yn stray dhiworth dha ordenansow,

rag falsuri yw aga brys.119:118 brys: Amendys war-lergh an Syriek ha'n Vulgat.

119Ty a syns oll tebeles an nor dhe vos plosedhes;

rakhenna my a gar dha dhustuniow.

120Ow hig a gren rag own ahanas,

ha my a berth own a'th vreusow.

121My re wrug gwirvreus hag ewnder;

na as vy dhe'n re a'm gwask.

122Gwra mewghya rag dha was er dader;

na as an re woethus dhe'm arwaska.

123Ow dewlagas a fyll ow yeuni war-lergh dha selwyans,

ha war-lergh lavar dha ewnder.

124Gwra dhe'th was herwydh dha dregeredh,

ha dysk dhymm dha ordenansow.

125Dha was ov vy, gwra dhymm konvedhes

rag may hwodhviv dha dhustuniow.

126Prys yw dhe'n Arloedh oberi,

rag i re dhiswrug dha lagha.

127Rakhenna my a gar dha worhemmynnow

moy ages owr, moy ages owr fin.

128Rakhenna my a gerdh yn ewn herwydh oll dha arghadowyow;

my a gas pub hyns gowek.

129Marthys yw dha dhustuniow;

rakhenna ow enev a's gwith.

130Diskwedhyans dha eryow a re golow;

ev a re skians dhe'n re sempel.

131My a igoras ow ganow, ha dyena,

rag my a yeunis war-lergh dha worhemmynnow.

132Treyl war-tu ha my, ha bydh grassyes orthiv,

herwydh dha usadow orth an re a gar dha hanow.

133Orden ow hammow y'th lavar,

ha na wres drogoberow maystri warnav.

134Daspren vy dhiworth arwask den,

may synsiv dha arghadowyow.

135Gwra dhe'th fas splanna war dha was,

ha dysk dhymm dha ordenansow.

136Ow dewlagas a dhewrak gans goverow a dhowr

drefenn na synsir dha lagha.

137Gwiryon osta, A Arloedh,

hag ewnhynsek yw dha vreusow.

138Ty re worhemmynnis dha dhustuniow yn ewnder,

ha len dres eghenn yns i.

139Tan ow holonn re'm distruis,

drefenn ow eskerens dhe ankevi dha eryow.

140Dha lavar yw pur dres eghenn,

ha'th was a'n kar.

141Byghan ov vy ha dispresys,

mes ny ankovav dha arghadowyow.

142Dha ewnder yw ewnder nevra a bes,

ha dha lagha yw gwirder.

143Anken ha poesyjyon re'm kemmeras,

mes dha worhemmynnow yw ow lowena.

144Ewnder dha dhustuniow a dhur bys vykken;

gwra dhymm konvedhes, ha my a vew.

145My re elwis a leun golonn; gorthyp dhymm, A Arloedh.

My a with dha ordenansow.

146My re elwis warnas; gwra ow selwel,

may synsiv dha dhustuniow.

147My a sev kyns dydh-tardh ha kria;

yn dha eryow y fydhyav.

148Ow dewlagas a dhifun kyns goelyow an nos,

rag may prederriv a'th lavar.

149Klew ow lev, A Arloedh, herwydh dha dregeredh;

bewha vy herwydh dha vreusow.

150An re a'm helgh gans sherewneth a dheu yn ogas,

ha pell ymons i dhiworth dha lagha.

151Ogas osta, A Arloedh,

hag oll dha worhemmynnow yw gwir.

152Seuladhydh my re wodhva dhiworth dha dhustuniow

ty dh'aga fondya bynitha.

153Mir orth ow anken, ha gwra ow delivra,

rag ny ankevis vy dha lagha.

154Pled ow hen, ha daspren vy;

bewha vy herwydh dha lavar.

155Pell yw selwyans a'n debeles,

rag ny hwilons dha ordenansow.

156Meur yw dha druedh, A Arloedh;

bewha vy herwydh dha vreusow.

157Meur aga niver yw ow helghysi ha'm eskerens,

byttegyns ny dreylis vy dhiworth dha dhustuniow.

158My a welas an re dhislen, ha keudh a'm beu,

rag ny synsons dha lavar.

159Mir fatell garav dha arghadowyow;

bewha vy, A Arloedh, herwydh dha dregeredh.

160Sommenn dha er yw gwirder,

ha pubonan a'th vreusow gwiryon a dhur bys vykken.

161Pennsevigyon re'm helghyas heb ken,

mes ow holonn a gren rag dha er.

162Lowen ov vy orth dha lavar

avel nebonan a gyv meur a breydh.

163Falsuri a gesis vy, ha'y skonya,

mes dha lagha a garav.

164Seythgweyth y'n jydh y'th wormolav

drefenn dha vreusow gwiryon.

165Kres meur a vydh dhe'n re a gar dha lagha,

ha nyns eus travyth a wrello dhedha trebuchya.

166My re wortas dha selwyans, A Arloedh,

ha kollenwel dha worhemmynnow.

167Ow enev re synsis dha dhustuniow,

ha my a's kar yn feur.

168My re synsis dha arghadowyow ha'th tustuniow,

rag bos oll ow fordhow a-dheragos.

169Re dheffo ow garm nes a-dheragos, A Arloedh;

gwra dhymm konvedhes, herwydh dha er.

170Des ow govynnadow a-dheragos;

gwra ow delivra herwydh dha lavar.

171Ow diwweus a lever gormola,

drefenn ty dhe dhyski dhymm dha ordenansow.

172Ow thaves a gews a'th lavar,

rag oll dha worhemmynnow yw ewnder.

173Bedhes dha leuv orth ow gweres,

rag dha arghadowyow a dhewisis.

174My re yeunis war-lergh dha selwyans, A Arloedh,

ha'th lagha yw ow lowena.

175Bewes ow enev, hag ev a'th wormel,

ha gwres dha vreusow ow gweres.

176My re wandras yn sowdhan avel davas yw kellys; hwila dha was,

rag ny ankevis dha worhemmynnow.