Salm gradhow.

1Porth kov, A Arloedh, a Davydh

ha'y boenvos oll;

2Fatell dos ev ti dhe'n Arloedh

ha lia li dhe Dhuw galloesek Yakob;

3‘Nyns av a-bervedh yn skovva ow chi

na yskynna yn tyller ow gweli

4ny rov kosk dhe'm dewlagas,

na hun dhe greghyn ow dewlagas,

5erna gyffiv tyller dhe'n Arloedh,

trigva dhe Dhuw galloesek Yakob.’

6Otta, ni a glewas anedhi yn Efratha,

ha'y havoes yn gwelyow an koes.

7‘Gwren ni mos bys yn y drigvaow ev,

hag omblegya a-dherag y skavell-droes.’

8Sav, A Arloedh, a-berth y'th powesva,

ty hag argh dha nerth.

9Bedhes dha oferysi gwiskys yn ewnder,

ha gwres dha syns garma yn lowen.

10A-barth Davydh dha was

na dreyl dhe-ves fas dha Untys.

11An Arloedh re dos ti yn gwiryonedh dhe Davydh;

ny wra ev treylya dhiworto:

‘Onan a'n frut a'th korf

a worrav war dha se.

12Mar kwra dha fleghes synsi ow hevambos,

ha'm dustuniow a dhyskav dhedha,

aga fleghes ynwedh bynitha

a vydh esedhys war dha dron.’

13Rag an Arloedh re dhewisas Sion,

ev re yeunis war hy lergh dhe vos trigva dhodho:

14‘Hemma a vydh ow fowesva bynitha;

omma y trigav, rag my re yeunis war hy lergh.

15Hy boes yn tevri a vennigav;

dh'y boghosogyon y rov bara lowr.

16Hy oferysi a wiskav gans selwyans,

ha'y syns a arm gans lowena.

17Ena y hwrav dhe gorn Davydh egina;

my re dhyghtyas lugarn dhe'm Untys.

18Y eskerens my a wisk gans meth,

mes warnodho y fydh y gurun ow splanna.’