1Gormelewgh an Arloedh.

Gormelewgh hanow an Arloedh;

gormelewgh ev, hwi wesyon an Arloedh,

2hwi neb a sev yn chi an Arloedh,

yn klosyow chi agan Duw.

3Gormelewgh an Arloedh, rag da yw an Arloedh;

kenewgh gormola dh'y hanow, rag grassyes yw.

4Rag an Arloedh re dhewisas Yakob dhodho y honan,

hag Ysrael avel y berghennogeth arbennik y honan.

5Rag my a woer an Arloedh dhe vos meur,

ha'gan Arloedh dhe vos a-ugh an duwow oll.

6Pup-tra a vynnas an Arloedh, ev a'n gwrug

yn nev hag yn nor,

y'n moryow hag y'n downderyow oll.

7Ev a wra dhe'n kommol yskynna dhiworth penn an nor;

ev a wra lughes rag an glaw,

ow tri an gwynsow yn-mes a'y dresorvaow.

8Ev a weskis an re gynsa-genys a Ejyp,

ha tus hag enyvales.

9Ev a dhannvonas toknys ha marthusyon

y'n kres ahanas, A Ejyp,

erbynn Faro hag erbynn oll y wesyon.

10Ev a weskis kenedhlow meur

ha ladha myghternedh alloesek:

11Sihon myghtern an Amorysi,

hag Og myghtern Bashan,

hag oll gwlaskordhow Kanan;

12hag ev a ros aga thir yn ertach,

ertach dhe Ysrael y bobel.

13Dha hanow, A Arloedh, a dhur bys vykken,

ha'th kovadh, A Arloedh, a unn henedh dhe'n nessa.

14Rag an Arloedh a vreus y bobel,

ha kemmeres truedh a'y wesyon.

15Imajys an kenedhlow yw arghans hag owr,

ober diwleuv den.

16Ganow a's teves, mes ny gewsons;

dewlagas a's teves, mes ny welons.

17Diwskovarn a's teves, mes ny glewons;

ha nyns eus anall yn aga ganow.

18Aga gwrioryon yw haval dhedha,

seul a fydh ynna.

19Chi Ysrael, bennigewgh an Arloedh.

Chi Aron, bennigewgh an Arloedh.

20Chi Levi, bennigewgh an Arloedh.

Hwi neb a berth own a'n Arloedh, bennigewgh an Arloedh.

21Benniges re bo an Arloedh dhiworth Sion,

neb usi trigys yn Yerusalem.

Gormelewgh an Arloedh.