Dhe vester an keur. A Davydh.

1An den anfur re leveris yn y golonn, ‘Nyns eus Duw.’

Legrys yns i, hag i re wrug obereth kasadow,

nyns eus denvyth a wrello dader.

2An Arloedh a viras war-woeles dhiworth nev war vebyon den,

dhe weles mars esa neb den fur

ow hwilas Duw.

3Pubonan re dreylyas a-denewen, legrys yns i war-barth;

nyns eus denvyth a wrello dader,

nyns eus nagonan.

4A ny gonvedh an dhrogoberoryon oll,

hag i ow tybri ow fobel kepar dell dhebrons bara?

Ny alwsons war Dhuw.

5Ena yth esens i yn own bras,

rag yma Duw gans henedh an dus wiryon.

6Hwi a lest kusul an boghosek,

mes an Arloedh yw y skovva.

7A teffa selwyans Ysrael yn-mes a Sion!

Pan dreyl an Arloedh kethneth y bobel,

Yakob a lowenha, ha heudhik vydh Ysrael.