Dhe vester an keur. Salm a Davydh.

1Gwra ow delivra, A Arloedh, dhiworth an tebelwas;

gwith vy rag an gour garow,

2neb a dewl droktowlow yn aga holonn,

ha pub dydh oll i a sord breselyow.

3I re lymmas aga thaves avel sarf;

yma venim nadres yn-dann aga diwweus. Sela.

4Gwith vy, A Arloedh, rag diwleuv an tebelwas;

gwith vy rag an gour garow,

neb a dewl towlow dhe wul dhe'm treys trebuchya.

5An re woethus re gudhas maglenn er ow fynn,

ha gans kerdyn ystynn roes,

i re worras antylli ragov ryb an fordh. Sela.

6My a leveris dhe'n Arloedh, ‘Ow Duw osta jy;

klew lev ow govynnadow, A Arloedh.

7A Arloedh Duw, nerth ow selwyans,

ty re beu skoes dhe'm penn yn dydh an gas.

8Na wront, A Arloedh, mynnas an tebelwas;

na wra dh'y dhroktowl spedya. Sela.

9‘An re a omsett a-dro dhymm a dhrehav aga fennow;

gwres dregynn aga diwweus aga fetha.

10Koedhes warnedha kolennow bew leskys;

bedhens i tewlys yn pollow leysek ma na yskynnons arta.

11Na vedhes fastys y'n tir an gour a gews sklander;

gwres droktra helghya an gour garow dhe derroes.’

12My a woer y hwra an Arloedh pledya ken an den gwann,

ha mentena gwir an voghosogyon.

13Sur, an re wiryon a woer gras dhe'th hanow;

an re ewnhynsek a drig a-dheragos.