Salm a Davydh.

1Arloedh, my a elow warnas, fisten dhymm;

klew ow lev pan alwav warnas.

2Re bo ow fysadow a-dheragos avel ynkys,

ha'm diwleuv drehevys avel offrynn gwesper.

3Gorr gwithyas, A Arloedh, a-rag ow ganow,

gwith daras ow diwweus.

4Na bleg ow holonn dhe dravyth dhrog,

dhe wul drogoberow

gans gwer a wra sherewneth;

na as vy dhe dastya aga boesow sawrek.

5Gwres den gwiryon ow gweskel,

gwres den len ow rebukya.

Na as dhe oyl an tebelwas untya ow fenn,

rag ow fysadow a vydh prest erbynn aga drogoberow.

6Aga breusysi a vydh tewlys dhe'n dor ryb an garrek,

hag i a glew ow lavarow, rag kemmeradow yns.

7Kepar ha den owth aras hag ow kloesya war an tir,

yn kettella y fydh aga eskern skattrys orth ganow ifarn.141:7: Tekst ebrow an gwersow ma yw legrys, ha'ga styr yw ankler.

8Mes ow dewlagas a vir orthis, A Arloedh Duw;

ynnos jy y hwilav skovva, na as vy dhe vos heb ammol.

9Gwith vy rag an vaglenn re worrsons er ow fynn,

ha rag antylli an dhrogoberoryon.

10Koedhes an debeles yn aga roesow aga honan,

ha my ow tremena yn saw.